ATAKE NA BAGDAD KU 7 MORTO

BAGDAD, AP.- Un atakante suisidio a laga su mes eksplotá ayera i a kousa morto di 7 persona na Baghdad, kendenan tabata dekorando tiendanan pa un selebrashon importante religioso shiita di otro luna, asina outoridatnan a bisa.
E atake a sosodé miéntras e abitantenan di e bario Eskan na Baghdad tabata prepará Ashoura ku ta konmemorá morto den siglo VII di e iman Hussein nietu di e profeta Mahoma, asina polis a bisa. Otro 28 persona a resultá heridá den e atentado. Un funshonario médiko a konfirmá e sifra di esnan ku a muri i esnan heridá. E dos fuentenan a papia sin ke bisa nòmber pasobra nan no ta outorisá pa duna e informashonnan ei. E grupo Estado Islámiko a tuma e atentado riba su nòmber, esaki den un komunikado ku nan a pone riba Internet i ku tabata dirigí kontra un reunion di miembronan di gruponan armá shiita.
Mayoria shiita di Irak ta víktimanan hopi frekuente di atakenan di Estado Islámiko i otro ekstremistanan sunies ku nan ta konsiderá e personanan di e denominashon religioso ‘ apostata’ ku nan ta konsiderá ku meresé morto.
Debí na Ashoura míles di peregrino shiita ta yega kada aña e pais, partikularmente e siudat di Karbala kaminda Hussein ta derá.
E atentado a sosodé un dia despues di ku kombatientenan suisidio di Estado Islámiko a efektuá atakenan ku eksplosivo den kual nan a mata 11 persona di forsanan di seguridat irakí i a heridá 34 otro den un akshon na nort di Baghdad.