ATLANTA.- Awe ta un dia grandi den deporte di Kòrsou. Esaki ora e YDK Andruw Jones su number 25 keda retirá ofishalmente pa e ekipo di Atlanta Braves. Ku ta nifiká ku nunka mas un hungadó por bisti e number 25 den e ekipo di Atlanta Braves. Andruw Jones alabes ta bira e promé YDK ku su number ta keda retirá pa un ekipo di Liga Grandi. Andruw Jones a debutá den Liga Grandi ku Atlanta Braves riba 15 di ougùstùs 1996. Den mesun aña ei Andruw a konektá dos honron den e promé wega di Serie Mundial kontra Yankees, birando asina e hungadó mas hóben pa konektá honron den Serie Mundial. 12 di e 17 temporadanan di Andruw Jones den Liga Grandi tabata ku Atlanta Braves. Den e periodo aki el a logra 10 wante di oro, el a bai All-Star Game na sinku okashon i gana un premio di Silver Slugger. El a bati tambe 368 honron komo hungadó di Atlanta Braves. Esaki ta bon pa e di sinku lugá di tur tempu pa loke ta trata e ekipo di Atlanta Braves. Andruw ku su 1117 kareda empuhá ta na di sinku lugá di tur tempu di e organisashon den e departamento aki tambe.  Miéntras den hit ku 1683 Andruw ta di nuebe lugá di tur tempu. Andruw ta tambe e hungadó di posishon ku mas wante di oro a gana pa Atlanta Braves.

Tur esaki ta motibu ku awe Atlanta Braves lo retirá su number 25. Andruw ta den e Salon di Fama di Atlanta Braves for di 2016 tambe kaba. E seremonia di e number den kua ta bai retirá e number 25 ta kuminsá awe 6.30 di anochi.