WILLEMSTAD.- Diferente atleta yu di Kòrsou ta na Lima, Perú, kaminda bou di bandera di Aruba nan ta kompitiendo den Weganan Panamerikano 2019. Awe diferente di nan lo mira akshon, manera ta e kaso ku siklistanan Liga Groothuesheidkamp. E karateka Jolano Lindelauf kende aña pasá tabata na Barranquilla pa Weganan CAC ku Kòrsou, tambe a yega Lima.  Den sailing, Philipinne van Aanholt i Tijn van der Gullik ta pendiente pa mira akshon.

Philip Elhage a kompetí den 10m airpistol kontra di 32 kompetidor. Den e promé buèlta Philip mester a tira un total di 60 tiru partí den 6 buèlta di 10 tiru. Den e buèlta Nr. 1  el a keda na di 21 lugá, den di dos na di 28 puesto, seguidamente na di 20 lugá. Den di kuater na puesto nr. 21, den di sinku na di 16 lugá i finalmente den di seis el a finalisá komo nr. 15. Su puntuashon total tabata 564. Den e resultado overall Philip a kaba na di 15 lugá overall.

E tiradó yu di Kòrsou no a pasa pa e buèlta final, pero si a logra klasifiká pa Weganan Olímpiko di Tokio 2020.

Siklismo

Hillard Cijntje a hasi su debut pa Aruba den e Weganan Panamerikano i a kore e modalidat di Omnium den e mahestuoso i moderno Velodrome na Lima, Peru. Cijntje a hiba un preparashon den eksterior miéntras ku na Aruba el a train bou di coach Aldrick Maduro. Cijntje a subi pista den un grupo ku vários nòmber ku tin un trayektoria impreshonante den e deporte aki. E 14 siklistanan a kore e distansia di 10.000 meter, ku tabata 40 ‘lap’ riba e pista di e Velodromo. Cijntje a bai bon sigur e promé 30 buèltanan, pero despues e velosidat a subi enorme i el a bin kai atras, pa finalmente kaba na di 12 puesto i un ‘lap’ for dje promé puesto.

Den su di dos start, Hillard Cijntje a kore e Omnium Tempo Race ku ta 40 lap (10km) kontra e mesun field di 14 koredó. El a finalisa na di 13 puesto.

Dia 7 di ougùstùs lo e ta riba pista pa kareda kontra di oloshi miéntras ku 10 di ougùstùs lo tin e ‘road race’.