WILLEMSTAD.- Den luna di aprel Christopher Elliot, Keanu Irausquin i David Hawker lo ta den oktagon di Mixed Martial Art (MMA) un biaha mas ora nan representá Kòrsou i nan skol IMMARTIAL na Aruba i Bulgaria. Elliot i Irausquin dia promé di aprel lo partisipá den Madness Fighting Comptition na Aruba. Miéntras Hawker lo ta un di e peleanan prinsipal dia 22 di aprel den un evento internashonal na Bulgaria. Esaki lo keda organisá pa e organisashon internashonal MMA Bushido.

David Hawker e siman aki a firma un kontrakt den kua el a akordá pa kompetí den eventonan internashonal di MMA Bushido. Aña pasá Hawker a partisipá den un evento di MMA Bushido na

E biaha aki David Hawker lo tin ku midi forsa kontra e franses invikto Noah Gugnon. Esaki lo tuma lugá durante MMA Bushido #86 na Bulgaria.

Hawker su prestashon aña pasá na Bruselas a hala atenshon den e mundu di MMA. E atenshon aki a pone ku e bringadó YDK lo ta un di peleanan prinsipal den e evento.

“Ganando e pelea aki mas porta lo habri pa Hawker i otro bringadó YDK”, Gideon Jonker entrenadó i manager di Hawker a bisa. “Nos lo monitoriá progreso despues di kada pelea miéntras awor aki e focus ta riba e pelea na Bulgaria”, Jonker a finalisá bisando.

Promé ku Hawker mira akshon, promé di aprel Elliot i Irausquin  lo ta den akshon na isla ruman Aruba. Christopher Elliot i Keanu Irausquin kada unu lo tin un rival di Aruba den nan respektivo pelea di MMA.

Tantu Christopher Elliot i Keanu Irausquin tabatin bon aktuashon na St. Maarten den desèmber tras di lomba durante un evento di kickboxing. Tur dos ta spera di logra mesun bon resultado e biaha aki den MMA na Aruba.

E ekipo di IMMARTIAL TA spera ku mas di su atletanan lo bringa den 2023. Fin di mart IMMARTIAL lo tin su kampionatonan di ekipo, miéntras ku den luna di mei huntu ku Honor Fight League lo organisá un evento internashonal.