Rumbo pa Barranquilla 2018

WILLEMSTAD.- Sinku atleta dje deporte di natashon lo ta na Barranquilla, Colombia, den representashon di bandera di Kòrsou durante dje CAC Games. E atletanan lo ta bou di guia di coach Nazario Martijn, kende tin amplio eksperensia komo tal.

...Nazario Martijn, coach di e ekipo di natashon pa Weganan Sentroamerikano i di Karibe...

Den entrevista ku Mundu Deportivo, Martijn a trese dilanti ku e preparashon pa CAC a start for di sèptèmber di 2017. E tempu ei a start ku bista riba  CARIFTA, pa despues sigui CCCAN i konkluí na Barranquilla. Sinku atleta a sobresalí durante dje trayekto ei i nan lo ta esnan pa hasi e biahe. Ta trata di Chadé Nersicio komo úniko dama, ademas di Seggio Bernardina, Seginni Marten, Mauricio Payne i Rainier Rafaela. Nersicio ta na Merka kaminda e ta sigui su training i lo e yega Kòrsou dia 14.

Nazario Martijn ta mira e kompetensia di CCCAN, na Aruba, komo un bon preparashon pa e atletanan. Vários di nan a drecha nan tempu riba e diferente disiplinanan, inkluso Payne kende a landa riba 5 evento i a kue sinku medaya, drechando tempu riba tur e eventonan ku el a landa.

E echo ku hopi di e hóbennan ta drenta skol na Merka, ta algu positivo. Pero tòg, segun Nazario Martijn, esei no sin mas ta nifiká ku tur lo mustra progreso grandi kompará ku nan prestashon na Kòrsou. Echo ta si, ku e ta kontentu ku nan por studia i landa na Merka. E ta premirá ku lo tin bon resultado i ku lo mira Chadé Nersicio den diferente final.