WILLEMSTAD.- Jandino Asporaat ta sera aña ku su show “Van je familie Moet je het hebben”, i ta habri aña ku otro komedia, pero e biaha aki ku e konosido diva Cynthia Martina den otro komedia “Atrako den chino”.

E komedia aki ta na papiamentu, i ta tuma lugá dia 5 i 6 di yanüari den WTC. Cynthia Martina tin e ròl prinsipal, Jandino mes lo aktua, miéntras komo e “chino”, a buska un persona chines mes.  E persona aki ta papia chines i papiamentu. Jandino a konta ku tres siman nan a sinta ku e chines, a trein e, i kuminsamentu yanüari e ta yega Kòrsou.

Na Kòrsou el a topa ku Cynthia Martina ku tin e ròl prinsipal. Cynthia mes a dal un gritu: “Cynthia na kabes dje atrako? I den chino?”. Ya kaba karchinan ta riba merkado. Jandino i su ruman Kenneth a skirbi e komedia aki. Cynthia a gradisí Jandino ku tin Oropa den su gara i a kere den su persona. Jandino mes ta kere ku yu’i Kòrsou mester kuminsá traha mas huntu ku otro, manera tur otro nashonalidat ta hasié, i aki nos no ta duna balor na nos hendenan. Jandino a bisa ku esaki ta e komienso di mas proyekto ku Cynthia. Pa loke ta trata e show: “Van je familie moet je het hebben” ta un komedia kaminda Judeska (Jandino) tin e rol prinsipal. E komedia tabata unu masha grandi na Ulanda, ku den tres luna a akapará 44 mil hende ku a presensiá e komedia. E ta un di su mihó shownan, Jandino a bisa. E tin 12 aña ku e ta solo, esaki ta su promé show ku mas hende. Su ruman Kenneth tambe a yud’é skirbi e komedia aki ku tabata un éksito na Ulanda.