WILLEMSTAD. – Ayera despues di 8 aña ainda famianan no a haña trankilidat pa por sera e kaso di asesinato di Helmin Wiels. Esaki pa e echo ku te ainda e motibunan pa kiko a kometé krímen no a sali na kla, esaki Aubert Wiels ruman di Helmin, a duna di konosé. Segun Wiels, ta pa poder i plaka a asesiná su ruman i un dia e bèrdat mester sali na kla i p’esei famia ta keda ku fe i speransa ku e kòmplòt kontra di Helmin lo sali na kla.

Aubert ta di opinion ku te awor aki, ni pa Korte ni pa famianan, e motibu eksakto ku a asesiná Helmin no ta konosí. Den mesun rosea Aubert a splika ku naturalesa ta regulá su mes i esaki ta tuma su tempu i ora esaki tin di sosodé e ta tuma lugá.

Ora e realidat sali na kla, kosnan grandi ta bai sosodé, pa motibu ku tin hopi traishon, tin hopi grupo poniendo hopi sèn pa e realidat no sali na kla. Ta trata di un grupo ku plaka ta nan Dios i ta mas ku kla ku Helmin a keda asesiná pa poder i plaka. E bèrdat aki tin di sali na kla i niun hende por para esaki, Aubert a bisa. E famia tin fe speransa i pasenshi pa mira esaki sosodé.

Echo ta ku ta trata di un kòmplòt grandi pa ku asesinato di Helmin. Si analisá e loke ku a sosodé dia 5 di mei 8 aña pasá, 5 or di atardi mei mei di hopi hende ku tur tin nan telefòn, ta bisto ku esunnan tras di e asesinato aki tabata ke a manda un mensahe kla.

Henter e suseso rondó di e asesinato, esta dianan promé i despues ta indiká sierto direkshonnan, manera kon miembronan di partido a pone preshon pa kore ku direktiva pa nan por a hasi loke ku nan ke. Kon a kaba ku e partido di paden i kon hendenan a influensia Helmin negativamente kontra di su amigunan di infansia di tur tempu pa traha kaminda pa e asesinato aki tuma lugá, no por pone Aubert pensa otro.

A influensiá pa e negoshá ku sierto organisashonnan ku nan tabata sa ku ta enemigunan mortal di e proseso ku Helmin tabata ke a kana, pero nan a influensi’é pa drenta den e gruponan aki i asina kibra su imágen den komunidat.

Pues si analisá tur kos ku a pasa, tabata un kòmplòt bon hinká den otro. Pero nada na e mundu aki lo no keda sin sali un dia na kla. Ainda tiki tiki tin kosnan ta bin aserka ku lo sòru pa un desenlase. Aubert Wiels a bisa.

 

 

 

LAGA UN KOMENTARIO

Please enter your comment!
Please enter your name here