KRALENDIJK – Un avion Saab di e kompania EZ-Air a pasa den skual ayera tardi lat ora ku el a aterisá riba pista di Aeropuerto Flamingo. Informashon di kua EXTRA ta disponé ta mustra ku aparentemente un tayer a rementá durante aterisahe. Pasaheronan na bordo a pasa den teribel spantu. Un señora edat ku tabata na bordo asta a kai den shòk i mester a haña asistensia di personal di ambulans.

“Basta persona a hiba sustu di nan bida”, Radio Live99 a informá ayera tardi den un boletin èkstra.
E avion Saab 340B tin kapasidat pa transportá 34 pasahero. E kompania di aviashon, ku tabatin Boneiru komo base na inisio, pero awor ta establesé na Kòrsou, a kuminsá hinka e tipo di avion aki den servisio aña pasá.

Tur tayer na e wilnan patras di e avion a rementá pa motibunan ku ta den investigashon. E pilotonan a logra dominá e avion, evitando un desgrasia mas grandi riba pista. Pero esaki no ta kita ku e situashon aki a krea sustu enorme serka e pasaheronan na bordo. E buelo 7z0671 tabata prosedente di Kòrsou.

Segun informashon, e avion a bai di banda na momentu ku e tayernan patras a rementá durante aterisahe di e avion. Ku basta esfuerso e pilotonan a logra tene e avion riba pista.

Di akuerdo ku e reportahe di Radio Live99FM, un señora di edat a kai den shòk i a pidi asistensia di ambulans p’e na aeropuerto. No a baha niun maleta ya ku tin un investigashon tambe a start pa sa e kousa eksakto dikon e tayernan di patras a rementá ora e avion tabata bahando.

E fotonan huntu ku e artíkulo di Live99FM, basá riba koperashon ku BONERIANO, ta duna un bista di e avion embolbí i mas imágen kaptá ayera tardi.