SAN SALVADOR, SALVADOR (AFP).- Diestres persona a muri na El Salvador i Guatemala debí na áwaserunan hopi fuerte ku ta bati Sentro Amérika for di siman pasá, segun outoridatnan dje dos paisnan, kendenan tambe a reportá míles di hende afektá pa inundashon i skùifmentu di tera. Na El Salvador, sinku persona a muri ayera ora ku tera a habri den e distrito wèst di Tacuba, segun direktor di Protekshon Sivil, Luis Amaya.
Ayera mes, segun Amaya, otro dos persona a pèrdè nan bida ora ku e vehíkulo den kua nan tabata a bai dal kontra di un palu ku a kai den parti wèst dje pais debí na e hopi áwaseru.
Otro kuater persona a muri entre djabièrnè i djadumingu den diferente sirkunstansia ku tin di aber ku e yobida.
Djadumingu anochi Kongreso salvadoreño a aprobá un estado di emergensia pa fasilitá e mobilisashon di rekursonan.
E presidente Nayib Bukele a anunsiá ku el a hasi un petishon na Kongreso pa deklará e dia di awa komo liber pa evitá hopi trafikashon i asina “redusí e riesgo di tragedianan”.
Na Guatemala, un muhé di 59 aña i un hòmber di 68 a pèrdè nan bida den Sacapulas ora ku un muraya a kai riba nan.
Segun un informe di sentro Nashonal di Orkan di Merka, áwaseru lo sigui kai den Sentro Amérika i den zùit di Mexico debí na “un área grandi di preshon abou ku ta formando riba Bahia de Campeche”. Segun ekspertonan a atvertí, “ta probabel ku lo forma un depreshon tropikal òf tormenta tropikal meimei di siman na kosta wèst di Golfo de Mexico”.
Tur aña, e temporada di áwaseru ta laga algun desena i te asta mas ku shen morto ku daño enorme den infrastruktura den Sentro amerikano, un dje regionnan mas vulnerabel pa e kambio di klima.
