KRALENDIJK.-Boneiru ta hañando hopi Áwaseru for di den oranan tempran di awe mainta. Kòrsou tambe a haña un poko awe den mainta tempran na algun área, ounke no muchu kos. For di Boneiru EXTRA a risibi imágennan ku ta mustra kon Áwaseru ta kai i na kosta i sigur den e área di waf por mira kon botonan ta balia riba awa debí na olanan basta fuerte.

Ta papia di un ‘zùitwèst’ ku a keda wanta riba Boneiru miéntras ku for di Venezuela tambe a mira un área ku basta moveshon ku ta produsí olanan grandi.

For di mainta e servisio ulandes KNMI a informa kapitan di haf sr. Gunther Flanegien i e na su turno a avisá mayoria piskadó pa nan tuma e medidanan nesesario. Ta asina ku kapitan di haf tin un komunikashon direkto ku mayoria piskadó via di e app group PiskaBon.

Despues di inspekshoná e área un bia mas (10:20 am) e kapitan di haf a informa EXTRA ku e wer a kambia i a bira zùitost. Laman ta un poko brutu pero te ainda e ta basta bou di kontrol. Mayoria piskadó a bai warda nan boto. E ta gradesido ku e situashon no ta mes serio manera último na oktober di aña pasá. Laman no ta haltu ounke tur boto a bira kabes pa otro banda. Tin hopi welek i awa ta yobe duru.