WILLEMSTAD.- Un deseo di hopi tempu – tantu den direktiva di fundashon Ride for the Roses Curaçao (RFTRC) komo di hopi partisipante – ta birando realidat, a lo ménos parsialmente. Mané, awor por kumpra karchi pa e sine ‘Motherless Brooklyn’ pa rekoudá fondo pa djaweps 28 di novèmber, aparte di e kompra tradishonal di karchi atraves di miembronan di direktiva i e puntonan normal di benta, awor por pidi i paga tambe di forma digital.
E promé akshon di RFTRC pa e temporada nobo di 2020 ta e estreno di Motherless Brooklyn dia 28 di novèmber mitar di 8 di anochi na The Movies na Otrobanda. Ta trata di un sine Amerikano di krímen, produsí i dirigí pa Edward Norton, basá riba e novela di e mesun nòmber for di 1999 di Jonathan Lethem. E sine ta grabá na 1957 na New York City i ta sigui un investigador privá ku e síndrome di Tourette ku mester resolvé e asesinato di su mèntòr. Norton ta e protagonista prinsipal den e sine, huntu ku Bruce Willis, Gugu Mbatha-Raw, Bobby Cannavale, Cherry Jones, Dallas Roberts, Alec Baldwin i Willem Dafoe.
E benta di karchi na rason di 50 florin pa persona ta aden kaba. E karchinan ta optenibel serka miembronan di direktiva di RFTRC, Bruna, Van den Tweel Zeelandia, 24 uur uit de Muur na Santa Maria i Mensing’s Caminada. Banda di esei pa promé biaha por kumpra karchi online tambe atraves di https://tibbaa.events/RFTR-MovieNight. Ohalá ku esei aworó lo por usa tambe pa kumbiniensia di tur esnan envolví despues pa mas aktividat di RFTRC.