WILLEMSTAD.- Ayera nochi tabatin e apertura di eksibishon di Fundashon Eligio Melfor (SEM). Un eksibishon úniko riba e trabou di e pionero di teatro, produktor, direktor, aktor i kompositor, Eligio Melfor.

E eksposishon ta kubri e skala amplio di kreashonnan teatral i artístiko di Eligio dunando atenshon na su obranan di inisio di su karera komo na esnan na final di su karera. Eligio ta konosí pa su obranan teatral alegre, kantikanan rekonosibel i su poemanan profundo ku semper tabatin un mensahe sosial.

E eksibishon ta tuma lugá den oula Habaai na Weg naar Welgelegen 64.

Awe djabièrnè lo tin tayernan di aktuashon.

Diferente skol a haña invitashon spesial. Tambe lo tin tayer i un programa pa grupo di personanan mayor di 60 aña. Íkono kultural Elia Isenia tambe lo hasi un presentashon. Lo tin aktuashon tambe di e aktor kómiko Ilse Schoobaar

Habrí pa públiko

Riba djasabra 5 di òktober, e oula lo ta habrí di 10.00 te 17.00 pa públiko. Lo tin oportunidat pa tur ku ta deseá tuma parti na tayer di poesia ku Tyson Hill, na tayer di aktuashon ku Shenyo Bokshoven i na tayer di músika ku Marvin Snijders.

Inskripshon pa un o mas tayer por tuma lugá via https://forms.gle/rhG6qMoD2LNKPiuw6 òf via Whatsappnr. 513-2951. Entrada pa e tayernan ta grátis (un donashon lo ta mas ku bon biní). No ta nesesario pa registrá pa bishitá e eksposishon.

Riba potrètnan nos por tuma nota dje públiko ku a presensia e apertura i presentashonnan ku tabatin ayera nochi durante dje apertura di eksibishon Eligio Melfor.