WILLEMSTAD.- Na final di dékada 80 i komienso di dékada 90 na Ulanda tabatin un agrupashon musikal bou dje nòmber ‘Bacchanal’ ku tabata masha popular. E banda konsistiendo di músikonan yu di Kòrsou a kompañá entre otro Janet Jackson i Lee Towers.
Awor despues di 27 aña e músikonan ta bolbe uni i prepará pa un serie di 5 presentashon na Ulanda, esaki despues ku e promotor Fred Carillho a kontratá nan pa e presentashonnan.
E banda di mas o ménos dos luna ta ensayando i ayera e direktor musikal, Ilvio Pietersz kende ta residensiá na Ulanda a bin Kòrsou pa dje forma ei nan kaba di prepará pa nan ‘tour’ den luna di desèmber 2019 na Ulanda.
Durante di nan presentashon na Ulanda lo tin un homenahe na Harold Biervliet, konosido kitarista di Trafassi kende debí na malesa no ta tokando mas ku e banda. Awor te intenshon pa Bacchanal bai kompañá Harold den algun kansion durante dje anochi di homenahe.
Bacchanal na Ulanda tabata hopi popular bou dje komunidat surinameño, esaki debí ku nan tabatin den nan repertorio vários kansion dje género Kaseko, ku ta popular na Sürnam.
Bacchanal ta konsistí di 7 músiko, Michael Boncoeur, Michael ‘Magoo’ Raymond, Ramses Seinpaal, Raul Antersijn, Hytel Rosalia, Roy Piper i Ilvio Pietersz.
Keda pendiente pa tende mas di Bacchanal!.