WILLEMSTAD.- Pa promé aña, riba e lugá di parker di Sambil na altura dje entrada ‘Playa Kanoa’ ta bai kombertí su mes den un área gigantesko di ‘grill’ kaminda diferente ekipo forma pa ekspertonan i afisionado di barbekiú ta bai kompetí den e kompetensia ‘Badia Smokin’ Hot BBQ Competition’ presentá pa Kooyman.
E ekiponan lo kompetí den 6 diferente kategoria: hamburger, seafood, picaña, ribs, galiña i ‘pork shoulder’. E evento manera a keda anunsiá ta tuma lugá mañan, djasabra 27 di mei 2017.
Michael Compton, presidente di e asosashon di bbq di Karibe a indiká ku nan ta emoshoná di mira tantu talento kulinario na e diferente grillnan ku tin na Kòrsou. “ E evento ya tabata un éksito na Puerto Rico, Antigua i na Nassau, Bahamas i awor ta toka turno na Kòrsou.
Nos propósito ta ku e ekiponan kuminsá kompetí den nos kompetensia di bbq, pa nan konosé, traha i eksperimentá ku e diferente karninan tradishonal di bbq i ku den e próksimo añanan nan drenta den e kompetensia di karninan ‘smoke’ ku ta un poko mas kompliká pa prepará. Di mes manera, Michael ta spera ku den futuro lo tin partisipashon di ekiponan for di Aruba, Boneiru i Venezuela, pa dje forma aki eksponé nan sabornan tradishonal i kondimentu ku ta karakterisá kada region”.
“Loke nos ta buska ta oumento e nivel di kompetensia i interes di e partisipantenan lokal pa nan prepará nan mes mihó, pa ora ku nan gana nan keda invitá pa partisipá den e evento di Puerto Rico kaminda nan lo tin e oportunidat pa partisipá na e kompetensia na Merka representando Kòrsou, asina Alexis Garcia, kordinadó dje evento di bbq a splika.
‘Nos ta hopi kontentu ku e apoyo di kompanianan lokal manera Pietersz Distribution, Kooyman, Coca Cola, Radio Direct i TV Direct, Mangusa, Chata ku a duna nan aporte pa desaroyá e proyekto aki na Kòrsou pa 2017 i e añanan ku ta bini, asina Garcia a indiká.
E promé ‘Badia Smokin’ Hot BBQ Competition’ presentá pa Kooyman ta kuminsá for di 3’or di atardi i lo konta ku diferente aktividat. E públiko lo por disfrutá di muzik, eksibishon, espektákulo artístiko, demostrashon di kushinamentu i purba e mihó barbekiú di Kòrsou.
E ekipo ganadó lo risibí riba 5 mil florin na premio, ku ta inkluí premio efektivo i e oportunidat pa representá Kòrsou na e ‘Smokin’ Hot BBQ Competition’ di Puerto Rico ku e posibilidat pa bai partisipá na un dje kompetensianan na Merka.
E públiko ku kumpra su karchi lo tin e chèns di purba e mihó bbq debí ku lo tin diferente tipo di karni ku lo keda entrega grátis ku kompra di bo karchi entrada. E aktividat lo tin diferente stent ku lo duna bu chèns di purba diferente tipo di kuminda.
Karchi di entrada ta inkluí e oportunidat pa por purba i kome e barbekiú.
Pa mas informashon dje evento bo por bishita e página di facebook facebook.com/curacaosmokinghotbbq