WILLEMSTAD.- Tur kos ta kla pa AMAK brinda e públiko ku ta bai asistí den Festival Center i esnan ku ta wak via di televishon un espektákulo ku tin tur ingrediente pa ta un dje finalnan di Festival di Tumba kaminda kantantenan lo tin ku kompetí fuerte pa por konkistá e korona.
Ayera nochi AMAK a tene un rueda di prensa kaminda nan a duna último detayenan dje festival. Puntonan importante pa kompartí ta entre otro: Porta ta habri for di 5.30 di atardi.
Ta hasi esaki debí ku mayan lo tin un show promé ku e festival kuminsá.

DOBLE R
E instituto musikal, Doble R ku Rignald Recordino na kabes mayan anochi lo ta den un showtime spesial ku lo kuminsá pa 6.30 di anochi. Durante dje presentashon di Doble R lo e kompaña diferente Rei di Tumba durante dje show ku lo tin un durashon di 45 minüt.
Sr. Manfred ‘Feco’ Gomes a indiká ayera nochi ku mester duna Rignald Recordino e honor ku e meresé i pueblo mester demostr’é ku ta apresiá su músika.

PROME BANDA
AMAK a informá mas aleu ayera nochi ku e banda number 1 pa mañan anochi, VEGA lo mester ta kla pa subi tarima pa 7.30 di anochi.
Otro punto importante pa e bandanan ta e konferensia di prensa ku ta tuma lugá promé ku e anochi final kaminda kada banda lo tin e oportunidat pa duna e órden di presentashon di e kantantenan. E konferensia di prensa ta tuma lugá kuartu pasá di 6. Tur banda mester sòru pa manda un representante.

BALUARTE
E aña aki e Festival di Tumba ta dediká na Sr. Eduard ‘Dito’ Mendes de Gouveia. Durante dje festival, entre banda 6 i 7 lo duna e baluarte su homenahe riba tarima.

MANTEL I KORONA
Ludgene Balentien pa di 5 okashon tabatin e enkargo pa konfekshoná e mantel i korona pa e Rei òf Reina di Festival di Tumba. E aña aki un biaha mas e mantel i korona ta masha kolorido i pe biaha aki tin un kantidat di ‘pòn pòn’ komo adorno èkstra riba e mantel. E korona tambe ta lusi masha bunita ku yen stenchi.
Pa finalisá, Feco Gomes komo presidente di AMAK a deseá tur e 12 bandanan i e 30 finalistanan tur klase di éksito pa awe nochi.