KRALENDIJK – Un asina yamá ‘boosterprik’ ta práktikamente inevitabel. Esaki si sigui desaroyonan na Hulanda, di kua Boneiru tambe forma parti. E gritu pa aselerá e proseso pa kuminsá duna un bakuna ‘booster’ na Hulanda pa hende grandi ta birando mas duru. Di mes por spera ku esaki lo bai sosodé na Boneiru tambe.

Situashon di Covid-19 ta hopi serio atrobe na Hulanda oropeo. E kantidat di kontagio positivo den kasnan di kuido di hende grandi pa simannan kaba ta subiendo drástikamente. Algun hospital na Hulanda ta atvertiendo kaba ku si sigui asina, nan lo mester bai na kódigo pretu.

Dòkter i direktornan di institutonan di kuido na Hulanda pa e motibu aki ke aselerá dunamentu di ‘boosterprik’. Esakinan lo mester bai duna hende grandi mihó protekshon pa evitá hospitalisashon.

Konseho di Salubridat a konsehá pa e luna aki di novèmber kuminsá ku ‘boosterprik’ na hendenan riba sesenta aña ku ta biba den un instituto di kuido.

Nan a hinka kaba un plan den otro na Hulanda kon lo mester pa atendé ku e bakuna ‘booster’. Ta bai invitá tur 60+nan pa bin risibí un bakuna ‘booster’ ku BioNTech/Pfizer òf Moderna, anke ku anteriormente nan a risibí un otro tipo di bakuna. Esaki ta konta tambe pa personanan 18+ ku ta biba den institutonan i personal di kuido ku kontakto direkto ku pashènt.

Plan ta pa kuminsá ku e kampaña di bakunashon ‘booster’ na desèmber awor. E 80+nan lo ta promé na turno. Esnan 60+ ta na turno den yanüari.

GGD-nan den vários parti di Hulanda ta práktikamente kla prepará kaba pa kuminsá ku e bakuna ‘booster’.

Anke na Boneiru ainda no tin informashon konkreto, tur kos ta mustra ku habitantenan di edat haltu tambe lo bai risibí e bakuna èkstra aki.