WILLEMSTAD.- Randal Corsen, a produsí i re-areglá ‘Biba Boy’, e medley di e 10 tumbanan ganadó di Boy Dap.
E tambe tabata presente ayera nochi na momentu ku a duna un homenahe na Boy Dap. Randal a konta su parti tambe den produkshon di ‘Biba Boy’.
“Pa mi ta un honor enorme. Mi tabata sa ku sr. Boy Dap ta biba na e kas aki. Semper ku mi kore akinan mi ta tira un bista riba e kas. Boy Dap ta un di mi ídolonan. Mi no ta konsiderá mi mes bieu. Mi konosé tur su tumbanan.
Ora Dibo a aserká mi ku e idea aki ma hañ’é fantástiko, pa hinka purba hinka tur 10 tumbanan den un medley, potpuri ku no ta muchu largu pa nan toke na radio, pero tòg pa duna un toke di tur 10 tumbanan.
Nos sa ku banda dje 10 tumbanan tin hopi mas ku ta hopi bon.  Ami mes tin vários faborito di mi, ‘bosonan ban lele’. Mi ta kòrda e tumba ei dia el a pasa na televishon mi tabata mucha. Tin vários ku ta hopi bon ku no a bin den e medley ku podisé mester bin un part 2 ku e tumbanan ku no a sali.
Tabata un honor pa mi pa purba kapta e esensia di e piesanan, no solamente e komposishon pero e estilo di kanta.
Mi ta pidi henter pueblo di Kòrsou pa keda balorá loke nos ta’tin den pasado pasó e ta e esensial pa nos, paso e ta fundeshi di loke nos tin awe.