WILLEMSTAD.- Pronto e sentro komersial Sambil ta konta ku un establesimentu nobo ku ta bai marka e diferensia den entretenimentu deportivo digital: Bam Bam Tech Sports Zone. Na e establesimentu teknológiko aki no solamente bo por midi i desaroyá bo produktividat (‘performance’) deportivo pero tambe entretené bo mes i bo amigunan di forma interaktivo. E konsepto ta unu inovativo pa Kòrsou i ku lo marka un era nobo di teknologia den deporte na Kòrsou. Pues e ta diseñá pa sirbi un klientela diversifiká komo ku e ta un lugá nobo ku ta brinda servisio na e hungadó serio di beisbòl i sòftbòl pero tambe na personanan di tur edat ku ta stima un reto pa asina saka e atleta ku tin den nan. E atleta serio ta haña e chèns pa bisa e picher digital eksaktamente kon duru e mester tira òf si e ke un kurva fuerte. Esaki ta un di e benefisionan di atendé ku un mashin na lugá di un humano, pero akinan e picheo ta sinti manera ta di bèrdat. E hungadó lo tin e eksperensia mas realístiko riba e isla. Anto mas ku tur kos, e hungadó lo tin data i algoritmo pa haña un bista aktivo i asina drecha su abilidatnan. Di mesun manera, e ta un lugá kaminda bo por hunga bo deporte faborito miéntras bo ta usa ekiponan di deporte di bèrdat i biba un eksperensia úniko, weganan ku ta manera den bida real riba e simuladónan mas mihó na mundu pa diferente deporte. Kargá ku bibida, bon servisio, kuminda dushi, bo por hinka bo mes den un mundu ekstraordinario di entretenimentu digital. Ta un lugá di futuro kaminda tantu hende grandi komo muchanan teener por pasa tempu sea individual òf huntu. Un esfera ideal pa famianan, team building òf djis un grupo di amigu ku ke dibertí. E meta ta pa habri promé ku desèmber 2021 na Sambil. Pues keda pendiente i sigui Bam Bam Tech Sports Zone riba Instagram pa bo tende for ki dia bo por pasa pa tèst e konsepto inovativo aki pa bo mes! Bambamtechtsz