WILLEMSTAD.- Kada Bario tin nan dia i kada Bario ta hasi nan kos i ta ku sumo orguyo, ku Buena Bista ta anunsiá plannan pa nan próksimo selebrashon. Den añanan 70, Bario di Buena Vista ta tin un Grupo Pastoral Buena Vista, ku ta move riba tereno sosial den Bario.

E grupo aki a bin huntu ku e meta, pa duna bèk na bario di Buena Vista, pero tambe pa motivá hóbennan pa nan sali na vanguardia di nan bario. Nan kier brinda hóbennan motibu pa nan por sinti nan bon ku nan Bario, ku hendenan di nan bario i sera nan konosí ku baluartenan di nan bario Buena Vista.

Ku e proyekto “Ban Broma ku Buena Vista” nos ke primeramente duna homenahe na baluartenan di Buena Vista, pero tambe sera hóbennan konosí ku nos baluartenan.

...Miembronan di komishon organisadó...

Di 29 di sèptèmber pa 1 (promé) di òktober lo organisá un dòbel homenahe, na Ompi Stefania i famia pa nan karera musikal i riba tereno deportivo duna rekonosementu na e eterno kampeonnan di Pichingolo ku ta un tim prosedente di bario di Buena Vista.

Durante e tres dianan aki Buena Vista lo ta di fiesta i lo trata mas tantu posibel, trese tur e baluartenan huntu riba e dianan aki; polítiko, mandatario, deportista, religioso, farandulero, lokutor, empresario, dosente, polis, hendenan di fishi i hopi mas.

E selebrashon ta kuminsá ku un Santu Sakrifisio di misa ouspisiá pa religiosonan ku a sali di e bario, sigui pa enkuentro di sòftbòl, ku deportistanan di e bario, ku músika di e bandanan/orkestanan di Bario di Buena Vista, animá pa hendenan di Buena Vista.

Entrada lo ta grátis i bar i kushina lo ta bon surtí ku preisnan di baka flaku. Klaro ku lo tin espasio pa e muchanan dibertí. E organisadónan ta konta na promé ku hendenan di Buena Vista i ku Kòrsou kompletu bin selebrá huntu ku nan i duna rekonosementu na baluartenan di Buena Vista.