WILLEMSTAD.- En konekshon ku 10 aña di fayesimentu, di nos gran kantante internashonal George Willems e aña aki, tabatin un show djamars anochi na bordo di Freewinds, ku intérpretenan amigu di George manera Juni Juliet, Richnald Vidal i su ruman Ernest Willems. Huntu ku nan Jose Villasmil, Lorenzo Muller i Freewinds Band reforsá ku sekshon di brass, basista, pianista i perkushon  lokal a sa di presentá un tremendo show di altu nivel digno di e nòmber ku e show aki a karga.
“Na nòmber di henter famia nos ta gradisí un i tur ku a bin kompartí e anochi aki ku nos, tur artista i músiko ku a hinka nan tempu, Freewinds Band i Giovany Atalita pa su sosten inkansabel”.
Dia 20 di novèmber awor nos ta presentá na pueblo di Kòrsou “Festival George Willems” ku ta duna oportunidat na intérpretenan pa kompetí pa e premio máksimo George Willems i premionan interesante.
Denter di poko lo duna mas informashon di e festival aki ku lo ta un reprodukshon di George su shownan ku e tabatin kustumber di duna na su públiko.
Si bo ta interesá pa partisipá di un forma òf otro na e festival aki manera por ehèmpel komo intérprete, bailarina etc., etc. por manda un e-mail na festivalgeorgewillems@gmail.com
Danki speshal na tur medio di komunikashon ku a duna nos nan apoyo for di e promé show i tambe su ripitishon. Keda pendiente pa 20 di novèmber awor. Danki pa a stima i sigui tene George Willems bibu den boso kurason.