WILLEMSTAD.- Den kuadro di Siman di Kultura 2017 ku su tema Willemstad 20 aña riba lista Patrimonio Mundial di Unesco, Landhuis Bloemhof i grupo di Komedia Thalia ta organisá un Foro Habrí tokante nos teatro nobo.

E anochi akí lo tuma lugá djárason 27 di sèptèmber 7 ‘or na Landhuis Bloemhof. Periodista Favell Maduro ta moderador di e foro ‘Ban soña nos teatro nobo – Centro Pro Arte den Patrimonio Mundial… si òf no??’.

Bloemhof i Thalia ke klousurá e eksposishon Rekuento, 50 aña di Teater, ku un regalo pa pueblo i nos gobièrnu. E regalo lo ta e resultado di e Foro Habrí akí. Thalia a selebrá su lustro grandi i awor ke  enfoká riba futuro.

Un teatro nobo ta inseparabel di e futuro di desaroyo di mundu di teater na Kòrsou. Un i tur ta invitá pa bin aportá  ideanan  konstrukivo i soñonan realisabel durante e foro interaktivo akí.

Por bishitá e eksposishon Rekuento, 50 aña di Teater te ku e promé siman di òktober.