WILLEMSTAD.- ‘GVR’ di Steven Spielberg, ‘DoublePlay’ di Ernest R. Dickerson, ‘Julieta’ di Pedro Almodóvar, ‘Nocturnal Animals’ di Tom Ford, ‘The Handmaiden’ di Chan-Wook Park, ‘The Light Between Oceans’ di Derek Cianfrance i ‘Tonio’ di Paula van der Oest ta pelíkulanan basá riba un buki, ku ta kompitiendo pa Parel voor de Beste Boekverfilming.
Esaki ta un premio ku públiko ta disidí pa medio di voto. Te 14 di sèptèmber tur hende por vota pa nan faborito. Riba 15 di sèptèmber na e festival Film By the Sea, un festival pa pelíkula i literatura, lo anunsiá e ganador, esta e pelíkula ku a risibí mas tantu voto.

Buki i Pelíkula
E pelíkulanan nominá pa “De Parel” ta basá riba e siguiente bukinan, den e mesun sekuensia: ‘De GVR’ di Roald Dahl (De Fontein), ‘Dubbelspel’ di Frank Martinus Arion, (De Bezige Bij), ‘Stilte’ van Alice Munro (De Geus), ‘Tony & Susan’ di Austin Wright (De Arbeidspers), ‘Vingervlug’ di Sarah Waters (Nijgh & Van Ditmar), ‘Het licht van de zee’ di M.L. Stedman (De Boekerij) i ‘Tonio’ di A.F.Th van der Heijden (De Bezige Bij).
For di pelíkulanan basá riba un buki, doñonan di libreria, bibliotekarionan i konosedónan di sine a skohe 7 pelíkula ku a sali entre promé di yüli 2016 i 31 di yüli 2017. Aña pasá ‘Publieke Werken’ di regisor Joram Lürsen, basá riba e obra literario di Thomas Rosenboom, a gana e “Parel voor de beste Boekverfilming”.
Por mira e 7 pelíkulanan aki na e festival Film By the Sea, ku ta tuma lugá di 8 pa 17 di sèptèmber. Nos kier a pidi bo pa Ban Vota pa DoublePlay: www.besteboekverfilming.nl/stemmen/