ULANDA.- “Kuenta i Tambú ta eksistí for di 2009, aña ku nan a lansa e gran éksito ‘Kalakuna’, e tempu ei e formashon tabata ful akústiko, perkushon ku kanto so. Na 2011 a kuminsá eksperimentá ku ritmonan elektróniko, pero semper manteniendo e kustumbernan di Kòrsou, esta perkushon, chapi i tambú.
Aworakí e nòmber a kambia bira ‘Kuenta’, esaki ta mas fásil pa e fanátiko kòrda, pero nos a mantené e chapi i barí den tur produkshon. Den sierto produkshon mas prominente i den otro komo efekto spesial. Den 2019 nos tei ainda!”, dje forma aki Roël Calister a deskribí e desaroyo ku a tuma lugá den su formashon musikal.
‘DEN E BEMBE’ kombersá ku Roël kende ta residensiá na Ulanda relashoná ku e último produkshon musikal ‘Banana’ ku a keda lansá siman pasá, un produkshon di ‘Menasa’ den  kolaborashon ku Kuenta.
‘Esaki te promé kolaborashon entre Kuenta i Menasa. Semper ma gusta Menasa su trabou. Den nos shownan bibu, nos ta toka sigur dos pa tres produkshon di dje. E kolaborashon a kuminsá 2 aña pasá.
Ku Kuenta nos a bai Caboverde i durante di nos estadia un dje integrantenan a graba un bendedó ambulante ta bendiendo ‘Banana’, e músiko a graba e gritu ‘Banana, Banana Maduro’. E ‘sample’ ei mi tabatin wardá.
Ora Bryan (Menasa) a puntra mi kiko bo tin wardá, ma manda e ‘sample’ ei pe. El a traha un kantika rònt di dje i mand’é pa mi, ami a hinka chapi, perkushon i bari mand’é bèk pe.
E produkshon Bryan a hasié den su studio i ami a graba den mi studio na Haarlem’, Roël splikando kon nan a yega na e idea, konsepto i produsí ‘Banana’.
Mas aleu Roël ta sigui splika: ‘Manera bo ta mira riba e ‘artwork’, bo tin banana bèrdè, hechu i maduro’. Tin hende por intérprete un tiki dòbel sintí, nos lenga ta un tiki asina’.
Chèns ta grandi ku lo tin mas kolaborashon entre Kuenta i Menasa. ‘E proseso dje produkshon aki a tarda un tiki. El a dura largu ‘back and forth’, pero ma sinti ku awor ta e momentu pa esaki, asina Roël ta splika ora a puntr’é kuantu a tarda promé ku ‘Banana’ a subi merkado. ‘By the way’, e proseso a dura dos aña!.
2020 ?
‘Nos ta kuminsá 2020 ku un tour na Ulanda. Den luna di febrüari nos ta kuminsá na saka nos promé produkshon musikal, sigui pa un atrobe den luna di aprel. Den lunanan di aprel i mei nos lo tin un gira chikí na New York i Los Angeles, Merka. Pa e temporada di zomer nos lo ta bèk na Ulanda pa presentá den algun dje festivalnan. Pa loke ta trata presentashon na Aruba, Boneiru i Kòrsou nos ta papiando ku promotornan. Nos ta hopi ansioso pa bin ku e konsepto nobo i e grupo nobo i wak kon e hendenan ta bai eksperensi’é’, asina Roël a terminá e entrevista.

Ban sigui sostené nos músikonan lokal!.