WILLEMSTAD.- E organisashon, Curaçao Sail Foundation a anunsiá e bandanan ku lo ta presentando den pre-show riba Plasa Brion riba dianan 15, 16 i 17 di yüli próksimo durante dje konsiertonan di ‘Velas Latinoamerica Curaçao 2018’.
Velas Latinoamérica 2018 ta un regata grandi di Amérika Latina di kual Kòrsou ta forma parti di dje riba e dianan 15, 16, 17 i 18 di yüli próksimo.
Pa e evento aki, Velas Latinoamérica Curaçao 2018 lo konta ku presensia di 9 'tall ships': 1. Navio Veleiro Cisne Branco (Brasil); 2. BE Esmeralda (Chile); 3. BAE Guayas (Ecuador); 4. BAP Unión (Perú); 5. ARC Gloria (Colombia); 6. ARBV Simón Bolívar (Venezuela); 7. ARM Cuauhtémoc (México); 8. NRP Sagres (Portugal);9. USCG Eagle (USA) i e fragata di Marina Real Zr. Ms. Friesland (Ulanda).

Riba e dianan 15, 16 i 17 di yüli lo tin riba e tarima prinsipal ku lo ta situá riba Plasa Brion konsierto riba tur tres anochi. Dia 15 di yüli lo tin presentashon di Junior Tecla i Vibenation. Pa e anochi aki e Marinierskapel su ‘dans orkest’ lo ta enkargá ku e preshow. Riba djaluna, 16 di yüli 2018 lo tin presentashon di Izaline Calister i e Marinierskapel kompletu di 51 músiko. Pa e anochi aki a skohe AxL & Friends pa animá e anochi den preshow.
Pa klousura di ‘Velas Latinomaerica Curacao 2018’ a skohe ERA pa aktua den e preshow kaminda Oscar D’Leon lo ta e artista prinsipal riba djamars, 17 di yüli 2018.
Keda pendiente pa mas informashon relashoná ku Velas Latinoamérica Curaçao 2018.