WASHINGTON, MERKA, AFP.- Banko Mundial a otorgá fiansa di emergensia na 100 pais pa esakinan lucha kontra e coronavirus. E paisnan aki ta kontené 70% di e poblashon mundial, segun indikashon di e institushon den un komunikado.
Di e paisnan aki, 39 ta den Afrika Subsahara i shete ta den Latinoamérika i Karibe, kual ta Argentina, Ecuador, El Salvador, Haiti, Honduras, Paraguay i Uruguay.
Di e grupo di pais benefisiá, un terser parti ta den krísis òf den situashon di konflikto, manera Afganistan, Chad i Niger.
“E pandemia i siere di vários ekonomia por hiba 60 mion persona den pobresa ekstremo, afektando gran parti di e progresonan resien lográ den e lucha kontra pobresa”, asina e presidente di Banko Mundial, David Malpass a bisa.
Den un konferensia na telefòn, Malpass a indiká ku esaki ta un “etapa importante” di esfuersonan di e Banko pa proveé 160.000 mion dòler den 15 luna.
