WILLEMSTAD - Banko Sentral di Kòrsou i Sint Maarten a konstatá monedanan falsu di 5 florin den sirkulashon na Kòrsou. Ta trata di monedanan di e añanan 1998 i 1999. E monedanan falsu aki ta di un tamaño sea un tiki mas chikitu òf un tiki mas grandi ku e moneda original. E diferensia di tamaño na promé bista no ta bon kla.

Un di e karakterístikanan di outentisidat di monedanan original di 5 florin ta ku nan ta magnétiko (esaki ta e kaso tambe pa e monedanan di 1 florin). Esaki ta nifiká ku nan ta keda pegá na un magnet. Esaki no ta e kaso ku e monedanan falsu.

Banko ta atvertí públiko pa ta kouteloso ora ta aseptá un moneda di 5 florin.

Kisas ta di mas pa Banko enfatisá, ku no ta permití pa ningun persona i/òf instituto aseptá monedanan falsu. Banko ta rekomendá bo pa tuma kontakto mesora ku polis asina bo ta kere ku bo tin di aber ku un moneda falsu. Pa falsifikashon di sèn òf pago konsientemente ku sèn falsu bo por risibí un kastigu di prizòn di maksimalmente nuebe aña.