MERKA.- Barack Obama ta den deliberashon ku Netflix pa produsí un serie nobo pa e kompania. Ta e intenshon pa Barack huntu ku su kasá, Michelle Obama lo bai konta kuenta.
Segun ‘The New York Times’ e dil no ta kla ainda. Segun Eric Shultz, un konsehero di Obama: ‘E presidente i Sra. Obama semper a kere den e poder di konta kuenta. Semper nan a konta kuenta di personanan ku a hasi un kambio aki na Mundu’.
Segun e korant, NYT, e serie lo tin un format kaminda e eks presidente lo bai dirigí diskushon riba temanan ku tabata importante durante di su periodo komo presidente.
Despues di su salida for di Kas Blanku, Obama a keda mantené su mes na altura di desaroyonan ku ta tumando lugá na Merka. ‘The New York Times’ ta ekskluí ku e programa lo ta un kaminda lo e bai vosiferá kritiká riba Trump.
Apple i Amazon tambe ta interesá pa produsí programa ku Obama.