BARCELONA.- Fuentenan di Barcelona a rekonosé ku nan ta serka di yega na un akuerdo ku Manchester United riba traspaso dje hulandes Frenkie de Jong.

Barca ta sigurá ku e preis final dje operashon ainda no ta sigur, pero for di Manchester United nan a duna di konosé ku e traspaso lo kosta 65 mion dollar.

E dos organisashonnan ainda mester yega na un akuerdo riba algun detaye ku por trese kuné ku e suma envolví por alkansá 80 mion dollar. E suma ei ta leu for di e 100 mion ku e klup catalan tabata pidi te ku algun siman pasá pa e internashonal hulandes.

Barca, hogá pa su situashon ekonómiko, ta haña su mes fòrsá pa deshasí di un futbolista pa kua apénas tres aña pasá nan a paga 75 mion euro, ademas di 11 mion na algun gastu, na Ajax di Amsterdam.

Awe ta fecha deadline ku ekiponan por yega na akuerdo pa kambio di hungadónan.

 A bende 1.8 mion entrada pa Kopa Mundial

QATAR.- Un kantidat di 1.8 mion karchi pa mira weganan di Kopa Mundial di Qatar ya a keda bendé. E komité organisadó dje Mundial di FIFA a informá ku den e promé fase di benta di entrada ya 1.8 mion karchi tin doño i ku dia 5 di yuli benidero ta kuminsá un di dos fase di benta. Awor den e di dos fase por kumpra karchi sabiendo kaba kua ta e 32 selekshonnan ku lo disputa e torneo.

E entradanan ta keda asigná segun e sekuensia di solisitut i ta keda konfirmá dirèkt despues ku risibí e pago.

Ademas dje pais anfitrion, e dies nashonnan ku a solisitá mas entrada den periodo di benta ta: Alemania, Arabia Saudita, Canadá, Emiratonan Árabe Uni, Merka, Spaña, Fransia, India i Inglatera.

E periodo nobo di benta di karchi ta finalisá 16 di ougùstùs den oranan di mèrdia. Pa kada fanátiko por kumpra un máksimo di seis karchi pa wega i 60 [a hinter e Mundial.

Man City lo skucha oferta pa Sterling

 MANCHESTER.- Manchester City a disidí ku nan lo no para den kaminda di Raheem Sterling kende tin intenshon pa uni su mes na Chelsea. City ta spera di risibí un proposishon entre 60 pa 75 mion dollar pa e miembro di selekshon ingles, kende ainda tin un aña di kontrakt den Etihad Stadium, pero si hasi un oferta adekuá, lo permití pa e muda pa Stamford Bridge.

Sterling a pone bon kla ku e ta interesá den un reto nobo despues di shete aña ku City i a keda impreshoná pa e plannan di Chelsea pa hasi di dje un hungadó klave bou di mando di Thomas Tuchel.

Sterling a rek e kombersashonnan riba firmamentu di un kontrakt nobo na City pa motibu ku e ta kere ku Pep Guardiola no tin’e den su plannan siendo ku bou di mando di Tuchel e ta spera di tin mas posibilidat.

Aparentemente City ta preferá pa Sterling aseptá un oferta pafó di Inglatera ku ekiponan manera Bayern Munich, Real Madrid i Paris Saint-Germain kualnan tambe ta interesá den su servisio, pero nan ta respetá su deseo si ta ku Chelsea e ke firma.

RAHEEM STERLING

Ta definitivo: Lukaku bek serka Internazionale

MILAN.- Awor si e ta ofisial, Romelu Lukaku ta regresá den shirt di Internazionale. E delantero belga ta di regreso ku un akuerdo di hür serka e klup ku kua den 2021 el a titulá kampion.

E akuerdo di hur ta bálido te ku yüni di 2023 i Chelsea lo risibí un montante di 8 mion euro mas bonus. Internazionle tambe lo paga e salario kompleto di Lukaku.

Inter riba socialmedia a konfirmá e transferensia. Riba imagennan por mira kon e presidente dj klup, Steven Zhang, ta yama Lukaku bon biní den su ofisina. Den kombersashon ku Zhang, Lukaku a primintí e presidente di lo skor hopi gol. “Mi ta kontentu di por tei bek. Bo ta kòrda tres aña pasá. E tempu ei nos tabata pará aki?

Ku e akuerdo aki, Lukaku ta regresá e ekipo den kua el a hasi hopi furor for di 2019. E goalgetter di tur tempu di Belgika den 2021 a yuda e klup gana su prome Scudetto den 11 aña. E tabata forma duo ku Lautaro Martine. E belga (24) i e argentino (17) huntu a skor 41 gol, kasi e mitar di tur gol ku Internazionale a skor den e kampionato ei. Pero Lukaku no a bira topskorer di 2021, esei a resultá di tabata Cristiano Ronaldo ku 29 gol.

Pero e aventura di Lukaku serka Chelsea no a resultá e loke a spera. Den zomer despues ku e delantero di 29 aña a bira kampion ku Inter, el a muai pa the Blues pa 113 mion euro. Pero e no a logra gara e puesto komo hungadó regular. Den26 partido e belga a skor apénas ocho gol, ku ta su kantidat mas abou den un temporada for di 2011/12 ku e tabata e aña ku el a laga su klup hubenil Anderlecht pa firma ku Chelsea.

ROMELU LUKAKU