LA GUAIRA, VENEZUELA (AFP).- Barkunan militar ruso djamars a yega Venezuela djis despues di a bishitá Cuba, tur dos pais aliado importante di Mòsku den e region. Periodistanan di AFP a tuma nota di dos barku bou bandera ruso mará den e haf di La Guaira, siudat bisiña di Caracas kaminda tin tambe e prinsipal aeropuerto dje pais.
Ministerio di defensa ruso a bisa ku e barkunan, Almirante Gorshkov ku ta e barku mas moderno dje flota ruso (den servisio for di 2018) i e petrolero Akademik Pashin, ta pertenesé na e Flota di Nort i lo ta na e pais karibense pa vários dia.
E meta prinsipal ta pa “mustra su bandera i garantisá e presensia naval den zonanan operativo importante”, segun e ministerio a bisa den un komunikado.
Despues di su bishita na Venezuela, e barkunan lo sigui ku nan “trabounan” den laman di oséano Atlántiko, segun nan a splika.
Gobièrnu venezolano no a informá di forma ofisial di e bishita.
Venezuela ta un dje aliadonan prinsipal di Rusia den e region i su presidente, Nicolás Maduro, a ekspresá apoyo na Mòsku durante su invashon di Ukrania, ounke tambe a boga pa negosiashonnan di pas.
Maduro a deskribí su kolega ruso, Vladimir Putin, komo su “ruman grandi”, despues di a selebrá su último reelekshon ku el a deskribí komo, “algu bon pa mundu”.
E presidente venezolano mes ta aspirá pa dia 28 di yüli keda eligí pa un di tres mandato di seis aña. Promé ku Venezuela, e barkunan ruso a bishitá Cuba, otro importante aliado di Mòsku den e region.
E barkunan a yega medio yüni, kompañá pa un supmarino di propulshon nuklear i un remolkador.
E prestashon no usual ruso na 150 kilometer di kosta norteamerikano di Florida a tuma lugá meimei di tenshonnan entre Washington i Mòsku pa e konflikto den Ukrania.
Promé di a drenta haf di La Habana, e barkunan a tuma parti na un “ehersisio riba uso di armanan di misil di gran presishon”, segun e ministerio ruso a indiká.