WILLEMSTAD.- Kontinuando ku kontròlnan e tim multidisiplinario formá pa entre otro MEO i tambe polis a kue kabes pa Bándabou.

E tim a kontrolá den área di Jan Noorduynweg, Weg Naar Wespunt, Souax, Grote Berg, Tera Kora, Pannekoek, Soto, Santa Martha, Jan Donker, Flip i Barber pa asina wak si tantu e komersiante komo klientenan ta kumpli ku e normanan di seguridat i higiena relashoná ku COVID-19.

Durante e kontròlnan a kontrolá 7 establesimentu di kual 2 a keda será.

E promé establesimentu ku a keda será tabata na Pannekoek debí ku e propietario tabata laga kliente para konsumí alkohòl dilanti di porta di su establesimentu.

E otro establesimentu kual tabata na Groot Sta. Martha tambe a keda será debí ku e propietario tabatin su negoshi habrí despues di orario stipulá, tabata bende bebida di alkohòl via porta na banda di e negoshi, tabatin mashin di plaka na e sitio i tambe tabata laga su klientenan konsumí bebida di alkohòl na e sitio.

Aparte di kasonan aki, na vários sitio polis mester a desmantelá grupo di hende aglomerá ta sosialisá i sinta bebe ku otro tantu promé komo durante orarionan di Toke de Keda.

Mirando tur loke a konstatá, sigur e kontròlnan aki lo ripití den Bándabou tambe.