BRUSELAS, AP.- Bèlgika a duna 23 mion dòler na e agensia di Nashon Uní pa yudansa di refugiadonan palestino despues ku e gobièrnu merikano a suspendé e entrega di 65 mion dòler na e organisashon.
E vise promé minister belga Alexander De Croo, a bisa djárason ku “pa mayoria refugiado palestino, UNRWA ta e último salbabida”. Entre otro proyektonan, e grupo ta yuda kasi mei mion mucha pa haña edukashon i ta prevení intentonan di radikalisashon.
De Croo a bisa ku e tabata rospondiendo na un pedido global di UNRWA ku speransa di kompensá rekortenan anunsiá pa gobièrnu di Donald Trump.
Bèlgika mester paga 19 mion den tres aña, pero debí na e nesesidatnan inmediato e pais lo entregá e suma kompleto, inmediatamente. Asina e ofisina di De Croo a indiká.
