WILLEMSTAD.- E benta di karchi di Curaçao Ponton Festival ta kuminsá mañan, dia 10 di mart di forma ofisial i ta start ku e úniko akshon di ‘Early Bird’. Mañan bishitantenan di e festival por kumpra karchi general i karchi ‘VIP’ na preis redusí di 10’or di mainta pa 6’or di atardi na Van Den Tweel Zeelandia. 
Organisadó Sumusica Curaçao B.V. ke duna mas tantu hende posibel e oportunidat di presensiá Curaçao Ponton Festival ku e akshon di ‘Early Bird’.
Un kantidat limitá di karchinan general i ‘VIP’ lo ta disponibel durante e akshon di “Early Bird” na preis respektivamente di Naf 50 i Naf 175. E karchinan di ‘VIP’ ta inkluí 10 bibida ‘premium’ manera kòktel, shampaña, ròm, wiski, vodka i biña. “Normalmente karchi regular ta kosta Naf 75 i karchi ‘VIP’ ta kosta Naf 275, pues nos hasi e festival aksesibel pa un i tur.
Dia 5, 6 i 7 di aprel e promé edishon di Curaçao Ponton Festival ta tuma lugá riba Brionplein i Kleine Werf. Sumusica Curaçao B.V. ta ferwagt bishita masal tantu di amantenan lokal komo internashonal di músika latino, pop, hip hop, urban, reggae, rock i soul.
E ‘line-up’ di e festival ta konta ku artistanan manera Jeon, Hef, Ronnie Flex, Rich Kalash, Randal Corsen Orchestra, Morgan Heritage, RockPack i Grupo Extra.
Un di e artistanan konosí ta e grupo RockPack kual ta konsistí di e siguiente artistanan renombrá: Bill Champlin, John Elefante, Fran Cosmo i Alex Ligertwood. Bill Champlin a gana dos premio ‘Grammy’ i ta konosí komo kantante di e banda Chicago. Algun kantika konosí di Chicago ta ‘Hard Habit to Break’, ‘Look’ i ‘Hard to Say I’m Sorry’. Alex Ligertwood ta un kantante, kitarista i drummer Eskoses, ken ta altamente konosí komo vokalista prinsipal di Santana. E banda di rock latinoamerikano aki a yega na éksito internashonal ku nan hitnan manera ‘Black Magic Woman’, ‘You Know That I Love You’ i ‘Oye Como Va’. Demas integrantenan di e banda Fran Cosmo, Kevin Chalfant i John Elefante tabata respektivamente kantantenan di e banda legendarionan di rock Boston, Journey i Kansas.