WILLEMSTAD.- E benta di karchi di Curaçao Ponton Festival ta kuminsá dia 10 di mart ofishal i ta start ku e úniko akshon di ‘Early Bird’. Riba e dia aki bishitantenan di e festival por kumpra karchi general i karchi ‘VIP’ na preis redusí durante 10’or di mainta i 6’or di atardi na Van Den Tweel Zeelandia.
Organisadó Sumusica Curaçao B.V. ke duna mas tantu hende posibel e oportunidat di presensiá Curaçao Ponton Festival ku e akshon di ‘Early Bird’. “Mi ke pa e komunidat di Kòrsou lubidá tur problema i disfrutá altamente di artistanan rekonosé lokal i internashonal durante e 3 dianan di e festival”, asina direktor di Sumusica Curaçao B.V., señor Gisgard Felida, a duná di konosé.
Un kantidat limitá di karchinan general i ‘VIP’ lo ta disponibel durante e akshon di “Early Bird” na preis redusí. E karchinan di ‘VIP’ ta inkluí 10 bibida ‘premium’ manera kòktel, shampaña, ròm, wiski, vodka i biña. “Normalmente karchi regular ta kosta 75 florin i karchi ‘VIP’ ta kosta 275 florin, pues nos ta purba yuda e pueblo mas ku ta posibel dor di hasi e festival aksesibel pa un i tur.
Dia 5, 6 i 7 di aprel e promé edishon di Curaçao Ponton Festival ta tuma lugá riba Brionplein i Kleine Werf. Sumusica Curaçao B.V. ta ferwagt bishita masal tantu di amantenan lokal komo internashonal di músika latino, pop, hip hop, urban, reggae, rock i soul.