BERLIN, ALEMANIA, AFP.- Alemania su kapital, Berlin, lo reforsá tur medida kontra hendenan ku no a vakuná, ningando nan akseso den tur bar, gym i kapsalon òf pa kome paden, den un esfuerso pa kontené oumento di e kasonan di COVID.

Solamente esnan kompletamente vakuná i esnan ku a rekuperá di un infekshon di COVID-19 por drenta fasilidatnan di dibertishon i un lista di sitio mas.

Senado di Berlin a bisa den un konferensia di prensa djárason mainta ku a tuma e desishon aki pa kontené e kasonan kresiente di Corona vírùs i kita preshon for di unidatnan di kuido intensivo.

Teatronan, museonan i tur evento pafó ku mas di 2.000 bishitante manera weganan di futbòl ta prohibí pa adultonan no vakuná.

Menornan i hendenan ku no por haña un vakuna pa motibu di salubridat lo no wòrdu afektá pa e restrikshonnan nobo, un tèst negativo ta sufisiente den e kaso aki.

Tur kompania a wòrdu enkurashá pa pidi empleadonan pa traha for di kas i pa limitá trahadónan den ofisina na 50%.

E kansier aleman saliente Angela Merkel a pidi pa organisá un reunion urgente entre gobièrnu i lidernan regional pa akordá medidanan apropiá. Alemania su tasa di vakunashon aktual ta “demasiado abou pa prevení propagashon rápido di e vírus”, asina el a atvertí.