KRALENDIJK.-Tur kos ta kla pa Boneiru haña su gobièrnu nobo, formá pa partidonan MPB i UPB. Djaluna mainta durante di un reunion di Konseho Insular lo huramentá e tres diputadonan,kendenan ta Elvis Tjin-Asjoe (MPB), Nina den Heyer (MPB) i James Kroon (UPB) dilanti di gezaghebber Edison Rijna.

E siman aki sekretario di estado Raymond Knops i minister Kajsa Ollongren lo ta na Boneiru pa un bishita di trabou. Pues e mandatarionan ulandes por sera konosí mesora ku e gobièrnu nobo di e isla di flamingo. Pa Ulanda ta importante pa sigui e direkshon ku e gobièrnu nobo di Boneiru ta bai debí ku apénas algun luna pasá Ulanda a sera un akuerdo grandi ku Boneiru ku ta enserá yudansa, pero e ta mará na algun kondishon fuerte. Tabatin asta reklamo ku Ulanda a pone preshon pa logra e akuerdo ei prome ku elekshon na Boneiru. Hopi a konsiderá esei un forma pa Ulanda pone preshon riba partidonan ku bai elekshon, pa tene kuenta kiko ta bin despues di elekshon.

E kandidatonan pa bira diputado na Boneiru tambe mester a pasa screening, pero esaki a kana sin problema segun gezaghebber Rijna. Tur tres kandidato a haña e asina yamá Veklaring Omtrent Gedrag(VOG) segun e sistema nobo na Boneiru. Esaki ta algu paresido na e dokumentu di bon kondukta konosi aki na Kòrsou.

Den e gobièrnu nobo Tjin-Asjoe lo tin na su enkargo prinsipalmente Desaroyo Ekonómiko, miéntras ku su kolega di MPB sra. den Heyer lo tin enkargo di Asuntunan Sosial i James Kroon (UPB) lo tin enkargo di infrastruktura. Foto MPB