WILLEMSTAD.- Un gesto úniko i bunita ku no sa sosodé masha ta e echo ku kompanianan i/òf fundashonnan ta yuda gruponan di nos hóbennan, nos grandinan, personanan desabilitá ku ta kliente òf habitante di un instituto i na mes momentu tambe Shamiro Anita p’e por sigui desaroyá su músika kantando kantikanan positivo ku palabra di Dios.

Esaki ta loke a tuma lugá na momentu ku ACOYA Hotèl Suites & Villas, Japan NV/ Smart Home., Fundashon Bon Intenshon i CFSS a disidí di yuda un grupo grandi di abitantenan di Betesda i klientenan ku ta forma parti di SGR-Groep i Kas Bruder Puis pa nan por bai wak e konsierto & Show di Shamiro Anita, titulá “Nunka Entrega”.

ACOYA ta konosí pa su proyektonan bunita i eksklusivo di apartamentunan i Villa’s na Kòrsou. Japan NV/Smart Home tambe ta hopi gusta i konosí pa su porta ku bentana i tur kos pa kas ku negoshi di kalidat na bon preis. CFSS BV ta ofresé tur kos pa detektá i paga kandela outomátikamente i kos di seguridat pa protegé kas i negoshinan.

Fundashon Bon Intenshon tambe ta konosí pa su bon intenshonnan hasi pa nos komunidat. Vários ta e institutonan ku ta forma parti di SGR-Groep. Betesda ta e instituto ku ta kuida nos hendenan grandi ku desabilidat i Kas Bruder Puis ta yuda nos hóbennan.

Normalmente ta hopi difísil pa e personanan aki por bai presensiá un konsierto di e magnitut aki sin yudansa finansiero. Ainda ta buskando mas spònser i/òf donashon pa mas gruponan di mucha, hende grandi i personanan desabilitá por bai e konsierto.

E Gran Konsierto aki lo tuma lugá djasabra 30 di sèptèmber 2017 den International School kuminsando 7.30 di anochi. Ta trata di shownan espektakular pa henter famia disfrutá di dje. Lo tin diferente artista invitá di Kòrsou, Venezuela i Sto. Domingo. Shamiro mes ta gradisí Dios na promé lugá i ta manda un danki yena ku hopi bendishon na tur ku a i ta yudando.

Ku yudansa di spònser i donashon e konsierto ta bira posibel i lo duna oportunidat na tur presente pa gradisí i alabá Dios den un ambiente bendishoná.

Karchinan ta bayendo lihé i ta optenibel na Mensing, Tik Tak, Beep Beep, Kas di Beibel, 24 Uur Uit de Muur òf via Tel. 562-2233.