MERKA.- E kantante Beyonce, e futbolista Cristiano Ronaldo i e artista Selena Gomez a repartí entre nan tres e promé puestonan ku mas ‘like’ pa e usuarionan di e ret sosial ‘Instagram’ pa loke ta trata 2017, asina e plataforma a informá ayera.
E potrèt ku mas ‘like’ a resultá esun di Beyonce kaminda e ta pose durante su embaraso ku un ‘velo’ riba su kabes, e potrèt tabata bon pa mas ku 11 mion ‘likes’.
E futbolista portugues di Real Madrid su potrèt ku mas ‘likes’ a resultá esun kaminda e ta ‘pose’ ku su yu i su pareha, Georgina Rodriguez, esaki despues ku ela  kaba di duna lus na nan yu muhé den un hospital.
Un potrèt saká den hospital tambe ta loke ku a pèrkurá pa Selena Gomez optené e di tres lugá. Riba e potrèt di Selena bo por mira e kantante drumí riba kama despues di a kaba di hasi un operashon di transplante di nir, banda di un amiga, Francia Raisa, ku a hasi e donashon di e órgano.
Selena Gomez i Cristiano Ronaldo a alkansá den 2017 un total di 130 mion i 116 mion siguidó riba Instagram, dje forma ei e dos famosonan mas popular. Ta sigui nan Ariana Grande ku 115 mion, Beyonce ku 108 mion i Kim Kardashian ku 104 mion siguidó.
Instagram a keda kumprá pa facebook na 2012 i ta un plataforma ku aplikashon pa dispositivonan mobil i tin un komunidat di riba 800 mion usuario.