MERKA.- Den kuadro di e desasternan natural ku a sosodé rònt Karibe i México, e super strea Beyoncé a uni ku e kantante di reggaeton Kolombiano, J Balvin pa traha riba un remix di ‘Mi Gente’, éksito di Balvin ku e produktor Willy William.
E kansion ku a keda lansá riba e websitenan di ‘streaming services’ djaweps último i e tim lo hasi un donashon di tur loke ku e kansion produsí pa organisashonnan karikativo trahando na México, Puerto Rico i otro islanan afektá den Karibe.
Beyonce den un deklarashon pone riba su website a indiká ku nan ta konmoví pa e devastashon ku orkan i temblor a kousa na famianan rònt mundu. ‘ Tin diferente manera pa yuda i nos tin un lista di organisashonnan ku ta trahando na México i den Karibe dunando un man na esnan ku tin mas nesesidat’.
Den produkshon dje remix, Beyonce ta duna su kolaborashon for di e promé verso di ‘Mi Gente’ i ta sigui den forma bilingual manouvrá dor dje ritmo manera ‘Queen B’ so por.