WASHINGTON, USA (AFP).- Presidente merikano Joe Biden a anunsiá ayera e seramentu temporal dje frontera ku Mexico pa migrantenan, ora ku e sifra di entrada regular den Merka ta eksaheradamente haltu. Ta un medida drástiko riba un tema klave pa logra su reelekshon presidensial den novèmber.
“Pa Joe Biden, e seguridat di famianan norteamerikano ta na promé lugá. Pa e motibu ei, e presidente ta anunsiá akshonnan ehekutivo históriko pa impedí ku e migrantenan ta krusa nos frontera di forma ilegal pa pidi asilo”, segun e bosero di White House, Andrew Bates.
Outoridatnan a bisa ku ta spera ku e restrikshonnan lo drenta na vigor di forma inmediato, ya ku mester hasi algu awor aki na momento ku entrada di migrantenan ilegal ta superá 2.500 pa dia.
E teksto ofisial ta indiká ku lo habri e frontera bèk na momento ku e kantidat di solisitantenan di asilo ta bou di 1.500 pa dia.
Biden ta tratando na kambia su polítika migratorio despues ku enkuestanan a revelá ku e asuntu aki tin muchu peso pa e logra reelekshon den su revancha kontra e magnate i eks-presidente republikano Donald Trump (2017-2021).
Segun Trump, e migrantenan iregular ta esnan responsabel pa e oumento di delitonan violento den Merka, akusashon sin base pa loke ta trata datonan ofisial.
E magnate durante di su periodo komo presidente a anunsiá su intenshon pa konstruí un muraya na e frontera ku Mexico i awor aki ta intensifiká su retórika anti migrashon pa por regresá White House.
“Miónes di persona a drenta nos pais, i awor aki despues di kasi kuater aña di su liderazgo debil i frakasá, e liderazgo dje korupto Joe Biden ta pretendé finalmente di hasi algu na frontera”, segun Trump di 77 aña, den un video ku el a publiká ayera riba su ret sosial Truth Social.
E presidente di Senado, Mike Johnson, aliado di Trump, inmediatamente a kalifiká e medida di Biden komo “un pantomina”. Sinembargo, White House a splika ku Biden ta purba na frena un sistema di migrashon “ku a faya durante di dékadanan” i a kulpa e republikanonan den Kongreso di no ta koperá i di a blòkia un fondo di míles di mion di dòler pa trabou ku mester tuma lugá na frontera.
