WASHINGTON, MERKA, AFP.- Presidente di Merka, Joe Biden, lo biaha pa Saudi Arabia otro luna kaminda e lo reuní ku e prens heredero Mohammed bin Salman, distansiando di esfuersonan pa kondená e lider pa asesinato di un periodista opositor.
Kas Blanku a pone fin na vários siman di spekulashon, despues ku a anunsiá ku Biden lo biaha pa Israel, i lo bishita Wèst Bank i Saudi Arabia di 13 pa 16 di yüli.
Esaki ta bira e promé biahe di Biden komo presidente, den Medio Oriente.
“Nos por spera ku presidente ta reuní ku e prens heredero”, asina su bosero, Karine Jean-Pierre a bisa. Pero e reunion ku e prens saudi, tambe konosí komo MBS ta indiká un kambio kontroversial di polítika.
Komo kandidato presidensial, Biden a kondena asesinato di Jamal Khasshoggi na 2018. Khasshoggi tabata un periodista merikano nasé na Saudi Arabia, i konosí pa su artíkulonan di gobernantenan saudi den e korant The Washington Pòst. E presidente a señalá ku pa e akto aki e reino a kombertí den un “paria”.
