MERKA.- Bintikuater kantaoutor i kompositor, entre otro Pablo Milanés, Joan Manuel Serrat, Rubén Blades, Daddy Yankee i Oscar D'León ta riba e lista di nominadonan pa drenta e Salon di Fama di kompositornan Latino den 2019.
E seisnan ku keda eligí lo keda anunsiá durante di e di 7 edishon di ‘Premio La Musa’ ku lo tuma lugá dia 17 di òktober próksimo den James L. Knight Center di Miami, asina e organisashon a anunsiá den un komunikado ayera.
E presidente nobo di LSHOF, Delia Orjuela, a bisa ku pa bo drenta e Salon di Fama di kompositornan Latino ta un dje honornan di mas grandi ku un profeshonal di músika por risibí.
‘Henter e industria ta reuní pa rekonosé e trabou i e legado di kantaoutornan i kompositornan Latino kendenan ku nan joyanan musikal a enrikesé i inspirá generashonnan’, asina Orjuela a indiká.
Entre e nominadonan tin e kompositornan: Chico Navarro (Argentina), Michael Sullivan (Brasil), Fabio Alonso Salgado "Estéfano" (Colombia), Armando Larrinaga (Cuba),  Carlos Lara (México), José Antonio Rodríguez (República Dominicana), Yoel Henríquez (Puerto Rico), Luis Gómez Escolar (Spaña), A.B. Quintanilla (Estádos Unídos) i José Enrique Sarabia "Chelique" (Venezuela).
Kantaoutornan ku tambe ta nominá: Alejandro Lerner (Argentina), Erasmo Carlos (Brasil), Pablo Milanés (Cuba), Ivy Queen (Puerto Rico), Mario Quintero Lara (México), Rubén Blades (Panamá), Willie Colón (Puerto Rico) i Daddy Yankee (Puerto Rico).
E lista ta keda kompletá ku Johnny Pacheco (República Dominicana), José María Cano (Spaña), Joan Manuel Serrat (Spaña) i Oscar D' León (Venezuela).
For di e grupo aki lo sali finalmente e 6 personanan ku lo drenta e Salon di Fama via di votashon popular ku por tuma lugá for di djaluna último te ku 15 di aprel. Dia 6 di mei lo divulgá e ganadónan.