WILLEMSTAD.- Dia 24 sèptèmber 2017, den presensia di famia, konosí-, amigu-, bisiña- i demas invitadonan speshal a tuma lugá apertura di eksposishon Kombitu di Vikto.                                   

Un eksposishon dediká na e gran baluarte i kulturista Vikto Bartholomeus (q.e.p.d i ku na su turno ta e promé fase na kaminda pa realisá Museo Vikto Bartholomeus.  Kombitu ta un lugá kaminda hendenan yegá na otro, hendenan ku ta den bo sírkulo di konfiansa ta bini huntu i kompartí ku otro.

Pues Famia Bartholomeus di e forma aki ta invitá pueblo di Kòrsou drenta Kombitu di Vikto. E eksposishon ta duna un bista di bida, legado i vishon emansipadó di defuntu Juan Vicente ‘Vikto’ Bartholomeus.

E tópiko mayó, ku ta keda presente den tur loke el a hasi riba tur diferente terenonan ta su aktitut emansipadó i vishonero. Sr. Bartholomeus, Shon Vikto, semper a kana pasonan dilanti kompará ku sobrá, semper tabata kurioso pa e mes siña i tambe siña otronan.

E tabatin un empeño insesante pa laga herensia atras pa otronan. Apertura di Eksposishon Kombitu di Vikto a bira un realidat danki na sosten di Prins Bernhard Cultuurfonds Caribisch Gebied, Curaçaosche Wegenbouw Maatschappij, All Signs, Visuals Graphic Studio, Global Paint, Kas di Kultura i NAAM.

Por bishitá e eksposishon di 10 am pa 4 pm, di djaluna pa djadumingu, ku eksepshon di djamars, na Rust en Pad   20.  Famia Bartholomeus ke gradisí tur persona ku a hasi akto presensia riba dia spesial aki i den mesun rosea ke invitá boso na un Ban Topa ku lo tuma lugá dia promé di òktober awor na Museo Vikto Bartholomeus.

Riba e dia aki, for di 10’or di mainta, lo tin músika, benta di mata, pal’i fruta, artesania, kos dushi i un bar i kushina bon surtí.    Museo Vikto Bartholomeus ta warda bo. Pa mas informashon tuma kontakto ku e museo na numbernan 864-1576 òf 566-1315.
tambe por bishitá nos página di Facebook: Museo Vitko Bartholomeus.