Elodie Heloise; Esun ku no purba no ta yega nunka
Blauwe Tomaten, buki skibi pa Elodie Heloise ta riba e lista di nominadonan pa e premio literario ulandes Libris 2024. Den luna di mart lo saka e finalistanan ku ta bai pa e premio Libris 2024. I nos mester bisa ku siendo un nominado, ya kaba Blauwe Tomaten ta un ganadó. El a keda skohe for di un lista di 189 otro publikashon i a bai den e 18 nan ku ta bai pa saka na luna di mart e 6 nan ku ta bai final. E lista aki ta kontené diesocho outor ku ta kompetí pa e nominashon pa e premio riba e lista ku ta yamá ‘shortlist’. Heloise a wòrdu selekshoná for di e 189 entradanan dor un hurado bou di liderazgo di Kim Putters. E anunsio di e lista kòrtiku di seis buki ta planiá pa 11 di mart den programa Nieuwsuur riba kanal di televishon hulandes NPO2, kaminda e seis outor nominá lo risibí kada un 2.500 euro. E entrega di premio lo tuma lugá durante un gala na Felix Meritis na Amsterdam. Ku e nominashon pa e premio literario Libris Heloise ta risibí rekonosimentu for di mundu literario hulandes. Blauwe Tomaten ta wòrdu publiká dor di editorial hulandes In de Knipscheer, ku semper tin atenshon pa outornan Karibense. Heloise, nasé na 1968, a traha pa hopi aña den mundu di periodismo na Kòrsou. E tin un amor pa e isla i ku esaki e tin un bos úniko den e literatura Karibense na Hulandes.
Blauwe Tomaten
EXTRA Djasabra a papia ku Elodie Heloise riba su eksperensia komo eskritor i su sentimentunan komo un nominado pa un premio asina prestigioso. Blauwe Tomaten ta un historia ku a tuma lugá na Kòrsou. Semper ora e skibi e ta hasié ku tópikonan ku tin di aber ku Kòrsou. Blauwe Tomaten ta tokante hende ku tin konekshon ku e isla. Nan ta biba diferente kaminda i algu a sosodé ku nan tin di bai bèk e isla pa atendé e kosnan ku nan por sigui den nan bida. Den e buki tin diferente kos ku tin di aber ku nos sistema sosial, skol, kon ta atendé ku mucha ku problema na kas, nos siudat ta den bista pa hende ku no tin kas. Asina tin diferente kos ku Elodie tabata sa di dje den e buki. E buki ta un novela.
Nada ta bèrdat, tur kos ta real
Elodie tin amor pa Kòrsou i pa hende pa e komprondé kon kos ta bai. Siendo periodista hopi bia bo ta yega na lugánan ku kisas otronan no ta yega fásilmente na dje i por sinta wak i opservá i haña informashon. Tur esakinan ta den su kabes i ora e kuminsá ku algu e ta piki i usa for di su ideanan. Manera el a bisa nos na hulandes “niks is waar, alles is echt”. Ku esaki el a splika ku e no por skibi na drechi di un tópiko ku e no sa nada di dje, ku e no a eksperensiá sino e no ta bira real. Mester konvensé esun ku ta lesa. I opservashon ta algu ku Elodie ta hasi hopi.
Purba diferente sistema di skibi
Blauwe Tomaten no ta Elodie su promé buki pero si su promé novela. El a bisa ku ta algu ku el a deskubrí i esei ta ku e ta gusta purba diferente sistema di skibi, Tin kolumna, komentario, editorials, resensia, buki pa mucha i e ta purba wak si e por logra yega na un produkto ku ta bon den e sistema ei. E tin un biki huntu ku Bea Moedt ku ta pa mucha. E tin un biki tokante karnaval, e tin otro di kuenta kòrtiku i diferente disiplina den área di skibimentu.
Próksimo lo ta pa mucha
Elodie no sa ku awor e por konsiderá su mes un novelista. El a bisa ku tur kos ta dependé di loke e ke konta. Awor e ta pensando den un buki pa mucha. E ta sintié un mucha di 8 aña i pa un mucha hopi kos ta misterioso. Tur kos ta dependé di kiko e ke konta.
E úniko den Karibe
Elodie su promé reakshon ora el a haña e notifikashon ku Blauwe Tomaten ta den e nominadonan pa premio Libris, el a bisa “waw” pasobra pa nos den Karibe, un buki di aki no ta yega asina fásil den e direkshon ei. Elodie su deseo tabata ora el a publiká Blauwe Tomaten di haña un tiki mas atenshon na Hulanda. I el a logra ku e punto aki tambe. Pero ta hopi aña no tin un di nos riba e lista ei. Kòrsou tin tres outor famoso grandi ku ta Tip Marugg, Boeli van Leeuwen i Frank Martinus. I ta manera kos ku no por yega mas leu ku nan i e plafòn ei a kibra segun Elodie. I pa Kòrsou esei ta importante. Pa e hóbennan i pa esun ku tin hopi tempu besig ta un konfirmashon ku nos por yega pasobra Kòrsou tin talento. I el a ripara esei ku hende ta kontentu i pa kolmo den su kaso e ta hende muhé ku ta yega asina leu. E promé sentimentu pa Elodie tabata Kòrsou. Ta e úniko buki di Karibe riba e lista ei i esei ta importante. I den e tempu ku nos ta bibando aki ta bon pa wak otro un tiki mas profundo pasobra nos mester di otro i mester di informashon pa komuniká i konektá ku otro. Esei ta loke el a haña bunita i sobrá ta di sinta warda, Elodie a bisa.
Hopi talento
Kòrsou ta den un ‘booming’ di talentonan ku ta saliendo na kla. Kòrsou tin hopi talento i Elodie ta mira esei tambe. E ta traha na Bloemhof kaminda ta ku arte nan ta traha. Pero e talento aki ta den teatro, baile, skibimentu i diferente área ta mira ku e talento ta saliendo. E generashon ku ta biniendo tin kurashi, nan tin ménos den e kerensia di faya pero simplemente nan ta hasié. Si no purba no ta yega nunka i e hóben ta yega na e punto di purba.
13 di mei ta final
Elodie a konta e proseso ku ta bai sigui. Dia 11 di mart awor lo tin e selekshon pa e último 6 buki pa e premio. Esaki ta nifiká ku 12 ta kai afó. E 6 nan ei lo kana un trayekto pa yega na 13 di mei ku e ganadó. Den un programa na televishon lo anunsiá e ganadó. Si e logra yega den e 6 e lo tin di bai Hulanda. Elodie a bisa ku tur kos ta konektá ku Nieuwsuur ku ta sigui e proseso. Promé ku esei na skolnan na Hulanda lo kuminsá hasi algu ku e 18 bukinan. Nan lo tin di buska un frase den e bukinan pa sa kiko ta inspirá nan i hasi algu kuné. Públiko no por hasi nada. E hurado ta profeshonalnan. Dia 11 nan lo manda un periodista pa informá e ganadó pa e grupo di 6. Awor aki e ta atendé ku loke tin awor. “Ta manera mi ta den Miss Universe i nos ta den e 18, nos a gana kaba”, Elodie a enfatisá.
A skibi for di na skol
El a bisa ku e no ta ansioso pero e ta sinta pensa “what if”, e gusta keda ku su pia riba tera i si e tin di logra e lo logra. E novela miéntras tantu a haña su atenshon na Hulanda kaba. E ta hañando masha mail i app i esun ku el a gusta ta un dosente ulandes na Radulphus ku a mand’é un mail. Tabata un dosente ku tabata un inspirashon pa Elodie, kende a permití nan di bai profundo. I e dosente aki a felisit’é. I e reakshon di Elodie na e dosente ta ku su manera di duna lès tabata asina dushi, ku Elodie a sintié bon. I e tempu ei Elodie a traha su eksámen den forma di un kuenta ku por sierto tabata un rísiko, pero el a logr’e ku un bon sifra. E dosente a kontestá Elodie bèk ku e tempu ei e mester a haña un hende pa lesa e kuenta di dje i esun ku a hasié tabata Frank Martinus Arion. E tempu ei Elodie tabatin 18 aña i un eskritor manera Frank Martinus Arion a lesa su kuenta.
Un skol pa skibimentu
Komo eskritor profeshonal i periodista Elodie a bisa nos ku e ta traha hopi den área di skibimentu na Bloemhof i di un forma kreativo. Aña pasá nan a traha riba e proyekto Sorry i esei tabata e esküs nan di Hulanda pa e historia di sklabitut ku tabatin impakto grandi. Na Bloemhof nan a hinka un eksposishon den otro pa reflehá riba e parti ei. E generashonnan ta wak e kada un di diferente forma. I 19 di desèmber 2022 van Huffelen tabata na Kòrsou i a skohe pa papia ku hóbennan den forma di un diálogo den katedral di Sumpiña. Einan tabatin 5 pregunta i mester a bin un diskushon. Tabatin un introdukshon i despues e pregunta i papia riba e tópiko. E evento aki tabata hopi great. E ta indiká ku e tipo di proyektonan aki ta importante. I pa yuda nos hóbennan pa nan saka nan talento, Elodie ta pensa riba un skol pa skibimentu.
Desaroyá UN
Na Kòrsou tin diferente talento. Tin hende ku ta outor, aktor, den pelíkula ku por regisá, skibi obra i ora ta asina multifasétiko ta mihó pa purba tòg pa desaroyá un di nan. Si tin diferente kos ta hasi, ta bon pa paga tinu pa no hasi di ménos ku por hasi. Hasiendo diferente kos no por desaroyá un di nan manera mester ta, tabata Elodie su konseho final.
