MERKA.- Universal, e empresa produktor di pelíkula a kumpra e ‘script’ di ‘Blond Ambition’, ku ta konta e bida di e kantante Madonna, asina a keda informá ayera.
E kuminsamentu dje pelíkula ku ta relatá e bida di e strea di músika, ku miéntras tantu tin 58 aña, ta kuminsá na inisio di dékada 80, na momentu ku Madonna a disidí di muda for di e estado di Michigan i ta bai biba na New York.
E historia ta konta kon e kantante a purba promé komo bailarin, pero ora ku esaki no a logra e disidí pa kuminsá kanta i komponé kansion.
Na 1983 el a presentá su promé albùm titulá ‘Madonna’ den kual tabatin e éksitonan ‘Holiday’ i ‘Borderline’, esei tabata e komienso di su éksitonan i ku lansamentu di e albùm ‘Like a Virgin’ na 1984, e kantante definitivamente a logra éksito.
Ken ta bai dirigí, ki dia e ta sali i si Madonna lo tin un ròl den e dokumental no ta konosí ainda.