TORONTO.- Blue Jays tabata interesá pa firma Andrelton Simmons promé ku e deadline di 31 di ougùstùs i awor ku e shortstop ta agente liber, a keda publiká ku Toronto atrobe ta interesá den servisio di e yu di Kòrsou.
Simmons den 2020 a hunga 30 wega, i a pasa simannan riba lista di hungadónan leshoná ku problema di ènkel i dia 22 di sèptèmber a hasi uso dje opshon pa pone fin na su temporada. Ku solamente 127 aparishon na plato, Simmons a bati basta bon (.297/.346/.356, 99 wRC+ i 95 OPS+), i tantu Jays komo kualke otro team lo tuma algu asina pa loke ta trata su ofensiva kombiná ku su ekselente defensa.
Pero Simmons tabatin problema ku ènkel, meskos ku tabata e kaso den 2019. El a hunga solamente 133 di posibel 222 wega den último dos temporadanan. Simmons ta figurá komo nr 17 riba e lista di tòp 50 agentenan liber. Hopi ta kere ku e pelotero di 31 aña lo mester tuma kontrakt di un aña, miéntras ku teamnan lo ta hopi kuidadoso pa dun’é un kontrakt di mas aña teniendo kuenta ku su historia di leshon.
Un kontrakt di un aña ta parse di ta kuadra ku e plannan di Blue Jays, miéntras ku e team ketu bai ta konsiderá Bo Bichette komo su shortstop pa futuro ounke ku un ‘upgrade’ defensivo pa un tempu kòrtiku ta bon biní. Firmando Simmons di forma indirekto lo regla Jays su problema na tersera, unabes ku Bichette òf Cavan Biggio por hunga den e skina kayente i e otro na segunda. Simmons no tin e forsa ofensivo manera otro shortstopnan menshoná pa Jays, manera Francisco Lindor òf Didi Gregorius, pero e por ta esun mas ekonómiko i sigur si tene kuenta ku Gregorius ta buskando un kontrakt di mas aña.