WILLEMSTAD.- Djabièrnè 10 di aprel i djasabra 11 di aprel un bes mas Pietermaai lo bolbe kombertí su mes den un sala di konsierto, kaminda el lo bai dediká su mes na e género di músika Blues durante e di sinku  edishon di e asina yamá “BlueSeas Festival di Kòrsou”.
E aña akí di nobo lo tin un variedat di talento internashonal di blues presentando riba e diferente esenarionan di e festival di riba kaya ku atmishon, pues entrada liber i grátis pa públiko den e bario históriko ya menshoná di Pietermaai. E programa kompleto ku su orarionan  i e podionan korespondiente por keda konsultá riba e sitio web (wèpsait).
DJABIERNE 10 di aprel
Manera hopi otro artista, Annika Chambers a kuminsá su karera artístiko kantando den misa. Pero no tabata te na su dos transmishonnan den ehérsito di Merka kaminda ku realmente el a keda rekonosé pa su talento komo tal ku e tabata disponé. Una bes ku el a bini Merka bèk, el a forma su mes banda ku tabatin e nòmber di, Annika Chambers, The House Rules Band.
Despues ku el a keda nominá i nombrá komo e Mihó Artista Nobo di aña 2015 den e órgano ‘Blues Music Awards’, el a mira su di dos álbum Wild & Free drenta na number 7 riba e lista di Billboard Blues Album. Su di tres álbum, ku e briante título Kiss My Sass, a sali aña pasá.
Eugene Bridges a nase na Nueva Orleans i el a krese na Amite. Tempu e tabata ya kaba un adolesente, e tabata kanta den un grupo di gòspel huntu ku su kuater rumannan hòmber. El a forma su mes banda di R&B i el a uni su mes na Forsa Aéreo merikano tempu e tabatin edat di 16 aña, kaminda e tabata toka den un banda di Forsa Aéreo.
Awendia e ta meskla Blues kontemporáneo ku e evangelio di su hubentut. Bridges tabata hasiendo gira  musikal  rònt mundu ku su Eugene "Hideaway" Bridges Band durante añanan largu i el a lansa henter un serie di álbum. E último álbum, Live In Tallahassee, a mira lus di dia na aña 2018.
E kantante i guitarista di blues, SaRon Crenshaw a siña toka su instrumento preferí tempu e tabatin e edat di apénas 10 aña. Komo un gran amante di e género di músika blues, el a laga su ídolonan inspir’é loke tabata algun di e mihó kantantenan i músikonan  inkluyendo  Albert King, Albert Collins, Stevie Ray Vaughan i Buddy Guy.
Crenshaw a rekoré e salanan di blues i e festivalnan na kosta Ost di Merka kaminda el a forma i a lanta un gran base di fanátiko den e partinan ei, su di dos álbum Drivin a mira lus di dia na aña 2017.
E pianista i tambe kantante Victor Wainwright a krese den un famia di músiko di blues i el a kuminsá establesé su mes bandanan tempu e tabata tin un edat masha hóben. Despues ku el a traha previamente ku Southern Hospitality i Victor Wainwright & the WildRoots, el a lanta i forma e banda  The Train na 2017. E banda a trese su álbum di debut homónimo riba merkado e aña siguiente, ku a keda rekompensá inmediatamente ku un nominashon pa Premionan Grammy i pa e premio pa e Mihó álbum di Blues Kontemporáneo Interpretá di e aña ei. E mesun Wainwright akí tambe a gana hopi otro premio mas manera esun di Piano Player of the Year.
E programa kompleto ta mustra di e siguiente manera: Djabièrnè 10 di aprel: Annika Chambers, Eugene "Hideaway" Bridges, SaRon Crenshaw Band, Victor Wainwright & The Train Djasabra, 11 di aprel: Nikki Hill, Ron Artis II & The Truth, Sugaray Rayfor ...
Festival Internashonal BlueSeas di Kòrsou ta un inisiativa di Fundashon Bon Intenshon i ta produsí pa Mojo Concerts.