WILLEMSTAD.- ‘DEN E BEMBE’ a kombersá ku Hubert ‘Juni’ Aniceta, presidente di Fundashon J.A.G., organisadó di Karnaval 2018 i 2019.
E promé pregunta ku a hasi Juni ta si el a pensa un dia pa ta na kabes di organisashon di Karnaval di Kòrsou. ‘Sinseramente bisa no, mi stima kultura, tur hende sa ku mi gusta, mi ta preparadó di Reina, Prens ku Pancho, Reina di Seú. Mi ta involukrá den eseinan, pero nunka mi’n pensa ku un dia lo mi ta na kabes’, asina Juni a deklará. Ta despues di 20 aña di sali Rei di Karnaval ku Juni ta na timon di Karnaval.
‘E ta un reto pa mi, mi sa ku Kòrsou tin hopi pa ofresé. Mi a partisipá na e destaho i e tabata un sorpresa pa mi, ma fris un ratu’.
Despues di un aña, ba mira kon tur kos a bai, ora bo sinta bo so i analisá kon e sentimentu ta Juni?
‘Awa a basha fo’i mi wowo. Karnaval ta pasando den un temporada no bon. Hopi partner a duda den e produkto. Ami tabata un hende nobo nobo, maske ku mi a hasi diferente kos, nos a bini ku Reina, Prens i Pancho Bándariba, ‘Midyear Carnival’ Bándariba, pero e parti di Karnaval tabata un magnitut hopi mas grandi. Bo tabatin 2 luna pa organisá Karnaval. Ora bo no ta den, bo no ta realisá kuantu esfuerso bo tin ku hasi pa bo yega na e partnernan pa bo yega na tur lokual ku bo ke hasi. Nos tabatin un lista grandi di inovashon, kosnan grandi. E tabata un reto grandi, tur e hendenan no ke tende despues, tur hende tabata ke ‘N’ami, mi ta hasi pa bo’. Nan tabatin mal eksperensia’, Juni a splika.

KREA KONFIANSA
E inovashon ku JAG a bin kuné a yuda pa krea e konfiansa bèk serka spònser i partnernan. ‘Mi no ta gaña, sin nos partnernan no lo no por a logra den 2 luna. Bo tin ku atendé ku Kòrsou kompletu, tur wowo ta riba bo. E tabata un ‘challenge’, nos tabatin un bon tim, Fundashon JAG ta un tim, nos tur kier a logra. Bo mester ta kreativo den sifra i obra di man pa bo keda den budget i logra ku un nivel altísimo tòg. Ku esei nos por a logra ku e konfiansa ku e spònsernan a hinka den nos. Pa e tim di JAG sèn no tabata na promé lugá, sino ban logra. Tabata 2 luna i piku di trabou hopi intensivo. Ora mi kai sinta mi so, awa tabata basha fo’i mi wowo. Nos a logr’e, nos a mustra ku por’.

SUPSIDIO DI GOBIERNU
Gobièrnu ta supsidiá Karnaval ku 350 mil florin, esaki ounke e montante pa produsí Karnaval di Kòrsou ta surpasá 1 mion florin. Riba esaki ‘DEN E BEMBE’ a puntra Juni Aniseta si e ta kere ku mester yega un kaminda ku Gobièrnu lo realisá su mes ku mester invertí pa Karnaval brinda un ‘spin off’ ekonómiko?
‘Mi ta kere esei si, nos tur sa ku bo ta sali den ‘rood’. Mi ta kere ku no Gobièrnu so, Gobièrnu ta parti di dje. Gobièrnu ku komersiantenan ku ta gana hopi for di dje mester por hinka mas tantu den dje, pasó e loke bo hinka bo ta hañ’é bèk. Nos a bini ku inisiativa pa hasi ‘fundraising’. Si bo no hasi fundraising bo ta keda den debe. Si Gobièrnu no hinka mas tantu den dje, si ta un hende ku no tin kreatividat, bo ta keda den debe. Gobièrnu mester hinka mas tantu huntu ku e komersiantenan. Karnaval ta un fuente ku ta hinka hopi mas sèn den kaha di Gobièrnu i komersiantenan’, Juni a terminá bisando.