WILLEMSTAD.- E hóbennan bòksdó Delano Streedel i Dwinley Mathilda tabata eksitoso den nan partisipashon fin di siman último den Dutch Boxing Championship ku a tuma lugá na Rotterdam, Hulanda. Tur dos a gana nan respektivo pelea i komo tal a risibí e faha di kampion di Nederlandse Boksbond.

E delegashon di Kòrsou pa e kampionato a konsistí dje dos hóbennan bòksdó menshoná i e tim di Supreme Boxing Centre Curaçao i Cheo Zimmerman, eks-kampion di bòkseo di Kòrsou. Supreme Boxing Centre Curaçao ku su propietario e trainer Coregelino Djaoen pa mas o ménos 3 aña ta forma hóbennan den e deporte di bòkseo i por bisa ku awor a kuminsá kosechá e frutanan riba nivel internashonal.

E dos hóbennan den peleanan sumamente intensivo i di suspenso a sali viktorioso i a pone nòmber di Kòrsou na laria. Delano Streedel a gana su faha ku un desishon unánime den Klase-B Welterweight (63-69 kg) riba Cem Dür. Di su parti, Dwinley Mathilda den Klase-B Light Heavyweight (75-18 kg) hubenil a logra un nòkout den promé round riba Hamza Mathkor.

Presidente di Curaçao Boxing Association (CuraBox), Edwin Baas, ta ekspresá su satisfakshon relashoná ku prestashon dje hóbennan. E tabatin kontakto ku presidente di Nederlandse Boksbond (NBB), Boris van der Vorst, i a palabra ku pa e próksimo Kampionato hulandes Kòrsou lo partisipá ku un delegashon mas grandi.

Djárason atardi Mathilda i Streedel ta yega Kòrsou kompañá pa nan trainer i coachnan.