Bolivia no ta bin komo turista

Deporte

Pa: Eldon “Peppie” Sulvaran

*‘La Verde’ manera e selekshon di Bolivia su nòmber di kariño ta, ta para 35 puesto mas haltu ku Kòrsou riba e último ranking di FIFA. Bolivia a bai Mundial tres be (1930, 1950 i 1994) i ta un be kampion (1963) i un be sup kampion Sur Amerikano (1997).

Na 1997 Bolivia a subi te na number 18 di mundu riba e lista di FIFA. Bolivia a produsí bon hungadó di bala manera entre otro Marco Etcheverry i Erwin ‘Platini’ Sánchez. Bolivia su éksitonan grandi mes nan sa di optené na kas. Ta asina ku nan ta tene nan weganan na kas, den Estadio Hernando Siles na un altura di 3.637 meter, kitando rosea for di nan kontrinkante ku no a kustumbrá ku e altura. P’esei na 2007 FIFA a saka un prohibishon pa tene weganan di futbòl na un altura di mas ku 2500 meter, pero despues di protesta a bin kita e límite.

Mesora Bolivia a kuminsá tene su weganan atrobe den mesun stadion. Bolivia sigur lo no ta fásil pa nos. Den weganan di klasifikashon pa mundial di Rusia aña pasá, nan a gana Argentina 2-0, Chile 1-0 i a tabla ku Brasil 0-0. Tur esaki na e altura di nan kapital La Paz.

Den e weganan pa klasifikashon pa mundial, Bolivia a sali riba Venezuela, ku ta para na puesto 48, ku ta un puesto mes abou ku nan riba e ranking di FIFA. Nan kuater mihó hungadónan ku ta bin Kòrsou kuné, ta nan portero Carlos Lampe , ku ta hunga su futbòl pa Huachipato den e divishon máksimo di Chile, Alejandro Chumacero ku ta nan bolante prinsipal ku ta hunga den e divishon superior na Mexico pa e ekipo Puebla i nan delantero, e veterano goliadó Juan Carlos Arce, ku ta hunga na kas pa Bolívar.

Riba Arce e ekipo ta stens pa e golnan. Bolivia ta hunga un futbòl di pasenan kòrtiku i ta kore hopi i rápido den espasio chikitu. Un estilo manera nos a mira El Salvador, pero riba un nivel mas haltu. E ekipo no tin hopi estatura. E selekshon, pasobra e la kustumbrá hunga na altura, no ta unu ku ta kansa fásil i ta move konstantemente riba tereno. Bolivia tin un baha, esei ta ku nan no ta bin ku nan máksimo goliadó, Marcelo Martins Moreno, ku awor ta hunga na China, pero ku a militá den bon ekiponan ruso, aleman, ingles i brasilero. Nan tin e bentaha ku hopi di nan hungadónan ta hunga profeshonal na Bolivia i regularmente por train fásil huntu den selekshon. Nan ta bon akoplá.

E defensa no ta e ekipo su parti mas fuerte. Den weganan di klasifikashon pa Mundial nan a tuma 38 gol kontra, mas ku tur otro pais di CONMEBOL, e Federashon Sur Amerikano di Futbòl. ‘Los Altiplanicos’ ta rankiá mas haltu ku tur nos kontrinkantenan den Karibe, inkluso Jamaica, Trinidad i Haiti i lo ta un wesu duru pa nos krak.

Ta masha tiki be nos ta haña posibilidat pa mira nos selekshon bibu, kontra un selekshon di e taya di Bolivia. Bin apoyá bo selekshon, e kampionnan di Karibe, djabièrnè 23 i djaluna 26 di mart 2018 den Stadion Ergilio Hato kontra e fuerte ekipo di Bolivia. Kòrsou rumbo pa mas éksito.