WILLEMSTAD.- Despues di e gran éksito tres aña pasá di Bon Bini Holland, e aktor i komediante Jandino Asporaat a bini ku ‘part two’ di e pelíkula humorístiko aki. Entrante djaweps 10 di yanüari  por mira Bon Bini Holland 2 na teatronan di sine na Kòrsou.
Bon Bini Holland 2 a estrená desèmber último na Ulanda i Bèlgika i den solamente sinku dia e pelíkula a sa di atraé 100.000 bishitante. Pa e motibu aki BON BINI HOLLAND 2 a risibí un ‘Gouden Film Award’. Entretantu mas ku 400.000 hende a mira e pelíkula I awor el a haña un status di platina na Ulanda. Bon Bini Holland 2 tin apénas un par di siman den teatronan pero den e par di dianan ei ya e ta e pelíkula hulandes mihó bishitá di aña 2018.
Bon Bini Holland 2 ta sigui konta e historia di Robertico i Noella. Robertico ta kla pa pa sigui su bida ku Noella i p’esei e ta pidi Noella pa kasa. Noella sinembargo ke un “time-out” for di e relashon ku Robertico  ta disidí di bai Ulanda. Robertico ku no ke pèrdè Noella ta bai Ulanda su tras i una bes einan e ta yama su amigunan di FC Kip pa yud’e konkista su dushi di nobo.
Robertico huntu ku Sydney, Rajesh, Gerrie i Tante Judeska ta harma nan plan pa asina trese Robertico i Noela huntu atrobe.
Jandino un biaha mas ta hunga mas ku un ròl. Den Bon Bini Holland el a hunga sinku ròl i awor den Bon Bini Holland 2 e ta tuma seis ròl na su enkargo. Otro aktornan den Bon Bini Holland 2 ta entre otro Liliana de Vries, Lone van Roosendaal, Dennis Rudge, Phi Nguyen, Sergio Ijssel en Alpha Oumar Barry. Mas aleu tin un aparensia special di e rèper Antiano Hef i tambe komediante Murth Mossel.
Bon Bini Holland 2 ta skibí pa Jandino Asporaat i Maarten Swart i Jon Karthaus a dirigí. Otro pelíkulanan ku Karthaus a yega di dirigí ta entre otro Bella Donna’s i Homies.
Amantenan di sine na Aruba, Bonaire i Sürnam tambe lo por mira Bon Bini Holland 2 entrante e siman aki.  Djárason 9 di yanüari tin e estreno di gala ku ta tuma lugá na The Cinemas pa kual ta pidi pa bisti bo trahe òf shimis di mas bunita ku bo tin den kashi. Jandino tambe lo bai tei.
Entrada pa e estreno di gala ta kosta 50 florin (òf 2750 Fun Miles) i ta inkluí un Heineken i tambe Chicken Wings. Por kumpra karchi solamente na The Cinemas entre 16:00 i 22:00. Ta risibí tur hende for di 19:45 or i e funshon ta kuminsá 20:15 or.
For di dia 10 di yanüari por mira Bon Bini Holland 2 na The Cinemas i Cinemark na Sambil.